Իմքայլականներին հանգիստ չի տալիս Սահմանադրական դատարանը

Նորություն չէ, որ Նիկոլ Փաշինյանը եւ նրա թիմը նպատակադրվել են կազմաքանդել Սահմանադրական դատարանը կամ գոնե այնտեղ տեղավորեն բացառապես իրենց կամակատարներին: Արդեն իսկ մի քանի անհաջող փորձ եղել է Սահմանադրական դատարանը գրավելու համար: Հիմա պատրաստվում է հերթականը:

Հենց այսօր տեղի է ունենալու «Իմ քայլը» խմբակցության նիստ, որի ընթացքում էլ իմքայլական կարկառուն եւ անխոնջ գործիչները փորձելու են կյանքի կոչել ՍԴ-ի վերաբերյալ Նիկոլ Փաշինյանի, իսկ եթե ավելի ճիշտ՝ Գագիկ Ջհանգիրյանի եւ տխրահռչակ ինքնահռչակ Վահե Գրիգորյանի գաղափարներն ի կատար ածելու համար:

Իմ քայլականները չեն էլ թաքէցնում, որ պատրաստվում են ՍԴ-ի վերաբերյալ ինչ-ինչ քայլեր իրականացնել: Չեն թաքցնում եւ հաստատում են այն պնդումները, որ ամեն ինչ անելու են ՍԴ-ն իրենցով անելու համար:

Ավելորդ է անգամ ասել, թե ինչ է լինելու երկրում, եթե հանկարծ իմքայլականները՝ Նիկոլ Փաշինյանի գլխավորությամբ փորձեն գնալ ապօրինի եւ հակասահմանադրական ճանապարհներով: Իհարկե, իմքայլականները պնդում են, թե գործելու են օրենքի տարրին համապատասխան, բայց եթե գործեին, ապա քննարկման չէին դնի ոչ միայն ՍԴ որոշումները, այլ նաեւ հենց ՍԴ գործունեությունը:

Իմքայլական մի քանի պատգամավորներ արդեն իսկ խոստովանել են, որ իրենք ՍԴ-ն օրինական մարմին չեն համարում, իսկ թե ինչ է նշանակում այս հայտարարությունները, հայտնի են անգամ դպրոցական ցածր դասաքրանցի ուշիմ երեխաներին:

Հայտնի մուլտֆիլմի բացասական հերոս միստր Ֆիքսի նման իմքայլականներն անգամ ունեն քայլերի մի քանի տարբերակ, եւ հենց այսօր որոշելու են, թե որ ապօրինի ճանապրհն են ընտրելու Սահմանադրական դատարանի ամրոցը գրավելու համար:

Ծանր է իմքայլականների եւ Նիկոլ Փաշինյանի գործը: Նրանք մի ուղղությամբ շարժվում են Ամուլսարի, մյուս ուղղությամբ Սահմանադրական դատարանի, իսկ մեկ այլ ուղղությամբ արտաքին աշխարհի դեմ: Ո՞նց են այս ամենի տակից դուրս գալու, դժվար է ասել, բայց որ իրենց քայլերով ծանր հարված են հասցնում մեր պետականությանը՝ փաստ է:

«Մենք ունենք մշակած մեր քայլերի մի քանի տարբերակ, որը քննարկելու ենք խմբակցությունում: Կորոշենք համատեղ, թե ինչ ընթացքով ենք գնում»,- անկեղծացել է կարկառուն քաղաքական եւ պետական գործիչ Մակունցը: Դե իսկ մենք էլ հերթական անգամ արձանագրում ենք, որ Հայաստանը բախվել է ներքին լուրջ մարտահրավերների, որոնց չհաղթահարման դեպքում հետեւանքները գերծանր են լինելու:

Նիկոլ Փաշինյանը արդեն իսկ վստահ է, որ պետությունը, այդ թվում օրենքները հենց ինքն է, իսկ իմքայլականներն այսպես են մտածում՝ մենք ասում ենք պետություն եւ օրենք՝ հասկանում Նիկոլ Փաշինյան, ասում ենք Նիկոլ Փաշինյան՝ հասկանում պետություն եւ օրենք:

Ռոբերտ Քոչարյանին ամեն կերպ անազատության մեջ պահելու ցանկությունը իմքայլականներին գցել է անդունդը, բայց նրանք դեռ այդ մասին չգիտեն եւ նոր դավեր են նյութում պետականության, օրենքի եւ մեր երկրի անվտանգության դեմ: Իրենց բուն գործով զբաղվելու փոխարեն պատգամավորները մտորում են Սահմանադրական դատարանը գրավելու, Արցախն իրենցով անելու եւ ընդհանրապես՝ Հայաստանը Թուրքմենստանի վերածելու մասին:

Եւս մեկ անգամ շեշտենք, որ ԱԺ-ն Սահմանադրական դատարանի հարցով չի կարող զբաղվել: Մի արեք, մի փորձեք, խաղաղվեք եւ անցեք ձեզ հատկացված ճանապարհը: Մի ծանրացրեք առանց այն էլ ծանր ձեր վիճակը:

Վարդան Մխիթարյան

Top-News.am