Իսկ ո՞ւր մնաց ՀԱԿ-ի հայտարարությունը կամ ՀԱԿ-ի հայտարարությանը սպասելիս

ՀԱԿ-ում սիրում են հայտարարություններ անել: ՀԱԿ-ում սիրում են խոսել պետության շահերից: ՀԱԿ-ը առիթը բաց չի թողնում շեշտել իր պետակաշինիչ գործունեության եւ դիրքորոշման մասին:

Հիմա սպասում ենք ՀԱԿ-ի արձագանքին վարչապետ Նիկոլ Փաշինյանի սեպտեմբերի 5-ին ունեցած դարակազմիկ հանդիպման մասին: Հիշեցնենք, որ Փաշինյանը հանդիպել է «Սասնա ծռերի» ներկայացուցիչների հետ եւ այդ մասին հանդիսավորությամբ հայտարարել է վարչապետի խոսնակ Վլադիմիր Կարապետյանը, որը ՀԱԿ-ում անդամությունը դադարեցրեց միայն վերջին պաշտոնը ստանձնելուց հետո:

ՊՊԾ գնդի գրավման օրերին ՀԱԿ-ը բավական սկզբունքային դիրքորոշում էր որդեգրել: Հիշեցնենք այն: Հայ Ազգային Կոնգրեսը չաջակցեց «Սասնա ծռերին», քանի որ ստեղծված իրավիճակում տեսավ պետականության կորուստի սպառնալիք: Այս մասին ի լուր աշխարհի հայտարարել էր Արամ Մանուկյանը:

Նրա խոսքով, ՀԱԿ-ը չնպաստեց էսկալացիայի աճին, քանի որ դրա մեջ տեսավ քաղաքացիական պատերազմի կամ պետականության կորուստի լուրջ վտանգ: Նա նաեւ հավելել է, որ բռնությունը չի կարող հանդիսանալ պրոբլեմի լուծման մեթոդ:

«Լուրջ հիմքեր կան ենթադրելու, որ նման լուրջ ցնցումներից հետո Հայաստանը կարող է կրկնել Ուկրաինայի, Մոլդովայի, Վրաստանի եւ Սիրիայի ճակատագրերը: Մենք չենք կարող ռիսկի տակ դնել մեր քաղաքացիների կյանքը»,- ներկայացնելով ՀԱԿ-ի դիրքորոշումն ասել էր Արամ Մանուկյանը:

Ի՞նչ է փոխվել այս տարիների ընթացքում: Ինչո՞ւ հիմա ՀԱԿ-ը չի տեսնում այն վտանգները, ինչ երեք տարի առաջ: Մի՞թե պակաս կամ ավել վտանգավոր չէ երկրի վարչապետի հանդիպումը զինված եւ պետության դեմ գործողություն իրականացրած խմբավորման առաջնորդների հետ:

Չէ որ, երբ պետության ղեկավարը հանդիպում է մի խմբավորման պարագլուխների հետ, որոնց գործունեության հետեւանքով երկու մարդ է զոհվել, տասնյակ մարդիկ վիրավորվել են, պետականությանը պակաս ծանր հարված չի հասցվում, քան բուն ՊՊԾ գնդի գրավումը:

Ինչո՞ւ ՀԱԿ-ը չի շտապում իր նախկին անդամին եւ գործող վարչապետին հարց տալ՝ ո՞ւմ կամ ո՞ր ուժերին եք սպառնում «Սասնա ծռերով» կամ ինչո՞ւ եք այդ հանդիպումով ոտնատակ տալիս հայ ոստիկանին, անվտանգության ծառայության աշխատակիցներին:

ՀԱԿ-ը պետք է անպայման հայտարարություն անի եւ իր վերաբերմունքը արտահայտի, ինչպես արտահայտում է շատ ուշատ հարցերի դեպքում: Հանրությունը սպասում է հայտարարությանը, հանրությունը ցանկանում է տեսնել, թե որքան սկզբունքային Կոնգրեսը եւ նրա առաջնորդը:

«Սասնա ծռերն» արդեն հանդիպումից հետո իրենց անվտանգության մարմինների, ուժային կառույցների գործառույթ են վերագրում, հայտարարելով, թե ոմանք ուզում ենք քաղաքական ռեւանշի հասնել, եւ թե մենք դա թույլ չենք տա:

Լավ կլիներ, որ հայտարարությունում ՀԱԿ-ը աշինյանին հարցներ՝ դո՞ւք եք «Սասնա ծռերին» նման լիազորություններ տվել կամ հայտարարեն, որ որեւէ քաղաքական ուժ չի կարող իրեն իրավունք վերապահել մեկ այլ քաղաքական ուժի թույլ տալ կամ թույլ չտալ քաղաքական եւ հրապարակային գործունեություն իրականացնել:

Սպասում ենք ՀԱԿ-ի հայտարարությանը: Պետականության կորստի վտանգը հիմա առավել մեծ է, քան ՊՊԾ գնդի գրավման օրերին: Հիմա գունդը գրավողների հետ հանդիպում է երկրի թիվ մեկ պաշտոնյան: Մի պահ պատկերացրեք Բուշի հանդիպումը բեն Լադենի հետ կամ Թրամփի հանդիպումը «Իսլամական պետության» առաջնորդների հետ:

Վարդան Մխիթարյան

Top-News.am