Արսեն Թորոսյան՝ մեր օրերի շվոնդերներից մեկը

Առողջապահության նախարար Արսեն Թորոսյանի փախուստը իր իսկ մամուլի ասուլիսից, մեղմ ասած, տխուր տպավորություն թողեց, իսկ ավելի տխուր տպավորություն թողեց նրա ֆեյսբուքյան լայվը: Լսելով նրան ակամա հիշում էիր Բուլգակովի «Շան սիրտը» ստեղծագործության Շվոնդերին:

Լսելով նախարարին, լսելով նրա խոսքը, ծանոթանալով մտքերին, երազանքին չես կարող չանհանգստանալ Հայաստանի ներկայի եւ վաղվա օրվա համար: Որտեղից այսքան մեծ ատելություն բոլոր նրանց նկատմամբ, ովքեր իր եւ իր նմանների նման չեն մտածում:

Ի՞նչ ատելությամբ է խոսում նախարարը Բժշկական համալսարանի ռեկտոր Արմեն Մուրադյանի մասին, ի՞նչ ախորժակով է խոսում համալսարանի խորհուրդի անդամներին փոխելու մասին: Մերօրյա Շվոնդերը՝ Արսեն Թորոսյանը, որը վախկոտ երեխայի նման փախավ ասուլիսից եւ առյուծացավ համակարգչի էկրանի հետեւում, գուցե վախում, սարսափում է, որ մի օր կորցնելու է իր պաշտոնը, այդ պատճառով էլ կարծում է, թե պաշտոնանկությունից վախենում է նաեւ Արմեն Մուրադյանը:

Արսեն Թորոսյանը որքան ցածրացավ, երբ հիշատակեց, ատելությամբ հիշատակեց, որ Արմեն Մուրադյանը հայտնի ընտանիքների եւ հայտնի մարդկանց ընկեր է: Արսեն Թորոսյան, իսկ դու ո՞ր ընտանիքների ընկերն ես կամ ի՞նչ կապ ունի ով ում ընկերն ու բարեկամն է: Եթե կոնկրետ ասելիք ունես՝ ասա, եթե չունես՝ ավելի լավ է լռես:

Նախարարի պաշտոնը զբաղեցնողը խոստովանում է, որ դեռ մեկ տարի առաջ մտադրվել է փոխել Բժշկական համալսարանի խորհրդի կազմը: Լավ, որտեղի՞ց ձեր մեջ այս բոլշեւիզմը, պետականաքանդ այս մտածողությունը: Եւ ո՞ւմ եք տեսնում խորհրդի կազմում: Քայլականների՞ն, շիշ բռնողների՞ն, քծնողների՞ն, հու հու, հա հա-ն լավ գոռացողների՞ն: Լավ ինչո՞ւ եք փափագում քանդել արդեն եղած կառույցը:

Կառավարության ակտիվ միջամտությամբ քանդվում է Տնտեսագիտական համալսարանը, փորձ է արվում քանդել Բժշկական համալսարանը, Պետական համալսարանը:

Թորոսյանի ֆեյսբուքյան լայվին հետեւելիս ակամա պատկերացնում ես, թե ինչպես է մութ սենյակում նա անկեղծանում. «Մենք այդ հին իշխանության ներկայացուցիչ խորհրդի անդամներին խեղդում ու խեղդում ենք, խեղդում ու խեղդում»:

Արսեն Թորոսյանը չի հերքում, որ իր կնոջ ղեկավարած հիմնարկին 2.7 միլիարդ դրամ է փոխանցել, միայն մեզ ծիծաղեցնելով, ասում է, թե կինը հիմնարկ չունի, եւ որ ընդամենը տնօրենն է:  

Վարդան Մխիթարյան

Top-News.am

Այս թեմայով Մենք ամեն ինչ անում ենք, որ ԼՂ-ից տեղահանված ընտանիքները բնակարան ձեռք բերեն, ոչ թե նախընտրեն երկարատև վարձակալությունը. Արսեն Թորոսյան 623 հազար դոլար հավելագրվածը պետք է վերադարձվի պետբյուջե. կոռուպցիայի մաս 5 Թորոսյանը «երկար չի ձգի» Նախարարությունում «բունտ» է հասունանում Թորոսյանից բացի նախարարի այլ թեկնածու չի եղել