Թուրքիայի նախկին վարչապետ Դավութօղլուին հեռացնում են Էրդողանի կուսակցությունից

Թուրքիայում իշխող «Արդարություն և զարգացում» կուսակցության (ԱԶԿ) Կենտրոնական գործադիր խորհուրդը նախկին արտգործնախարար և վարչապետ Ահմեթ Դավութօղլուին կուսակցությունից հեռացնելու պահանջով սեպտեմբերի 2-ին դիմել է կուսակցության Կենտրոնական կարգապահական խորհրդին: Որպես հեռացնելու պատճառաբանություն է ներկայացվում ԱԶԿ-ի ներքին կանոնադրությանը հակասող գործունեություն և վարքագիծ դրսևորելը: Այս մասին հաղորդում է artigercek.com կայքը:

Վերջին շրջանում Դավութօղլուին ԱԶԿ-ում անվանում էին «դավաճան», որին ի պատասխան նա նշել է. «Եթե ահաբեկչության դեմ պայքարի հարցում «տետրերը բացվեն», բազմաթիվ մարդիկ «մարդու երես չեն տեսնի»»:

Օգոստոսի 30-ին նախագահ Ռեջեփ Թայիփ Էրդողանը լրագրողների հետ ճեպազրույցի ժամանակ հայտարարել էր, որ իրենք որպես ԱԶԿ մտահոգություն չունեն իրենցից առանձնացած քաղաքական ուժերի առնչությամբ և հավելել, որ իրենք արդեն ոչ միայն ազգային, այլև միջազգային պատմություն են կերտում: Թուրքիայի նախագահն իր կուսակցության և իր կատարած գործողությունների կարևորությունն ընդգծելու համար հիշել է հետևյալ ասացվածքը. «Երբ էշն է սատկում, մնում է թամբը, իսկ երբ մարդն է մահանում՝ նրա ստեղծագործությունը»:

Ավելի վաղ Դավութօղլուն հայտարարել էր նոր կուսակցություն ստեղծելու և դրա հիմնական գծերը հանրությանը ներկայացնելու մասին: Հիշեցնենք, որ էկոնոմիկայի նախկին նախարար Ալի Բաբաջանը և արդարադատության նախկին նախարար Սադուլլահ Էրգինը նույնպես հեռացել են ԱԶԿ-ից:

Դավութօղլուն Թուրքիայի վարչապետն է դարձել 2014 թվականին՝ 5 տարի ԱԳ նախարարի պաշտոնը զբաղեցնելուց հետո, սակայն 2016 թվականին նա անսպասելիորեն վիճել է Էրդողանի հետ, ինչից հետո հրաժարական է տվել: