Ափսոս, որ Նիկոլ Փաշինյանը տեղյակ չէ, թե որոնք են Հայաստանի եւ Երեւանի խնդիրները

Լավ է, որ Նիկոլ Փաշինյանը զբոսնում է Երեւանում, ոչինչ, որ թիկնապահների ահռելի բազմությամբ, լավ է, որ նկատում է, որ ժամացույցները, դեկորատիվ ժամացույցները ճիշտ ժամը ցույց չեն տալիս, բայց չենք կարող չասել, որ մեր երկրի, մայրաքաղաքի խնդիրը դեկորատիվ, հիմնականում գեղեցկության համար դրված ժամացույցները չեն:

Իհարկե, լավ կլինի, որ քաղաքապետը ուղղի փողոցներում, դեռ հին եւ «հանցավոր», «թալանչի» իշխանությունների կողմից տեղադրված ժամացույցները, բայց մինչ ժամացույցներին հասնելը գոյություն ունեն շատ ավելի կարեւոր հարցեր եւ խնդիրներ:

Պետք չէ փորձել այնպիսի տպավորություն ստեղծել, որ բոլոր հարցերը լուծել են եւ մնացել է դեկորատիվ ժամացույցների ճիշտ աշխատանքն ապահովել:

Մինչ ժամացույցներին հասնելը պետք է հասկանալ, թե

ինչո՞ւ է շարունակվում բանակի եւ զինվորականների հեղինակազրկման արշավը եւ ի՞նչ նպատակ է այն հետապնդում,

ինչո՞ւ է Ռոբերտ Քոչարյանը գտնվում կալանքի տակ եւ ի՞նչ նպատակ է հետապնդում նրա դեմ հարուցված ակնհայտ «կարած» գործը,

ինչո՞ւ է նպատակասլաց կերպով փորձ արվում ատելություն սերմանել արցախցիների եւ Արցախի առաջնորդների նկատմամբ,

ինչո՞ւ է կառավարությունը գումար տրամադրում եւ Արցախ գործուղում երկու Հ.Կ-ի, որոնք մրցույթում չեն հաղթել, եւ որոնց անդամների նկատմամբ հասարակության մի զգալի մասի վերաբերմունքը միանշանակ չէ,

մինչեւ ե՞րբ պետք է Հայաստանում շարունակվեն «ասֆալտին փռելու» շոուները, ձերբակալությունները եւ բեմականացման վերածվող խուզարկությունները,

ինչո՞ւ է կառավարությունը 400 հազար դոլար հատկացրել լիբանանյան մի կազմակերպության, որն Ամուլսարի հանքի շահագործման վերաբերյալ այդպես էլ որեւէ լուրջ եւ ինքնուրույն ուսումնասիրություն չի իրականացրել,

ինչո՞ւ է կառավարությունը համառորեն ցանկանում շահագործել Ջերմուկ առողջարանից ընդամենը հարյուրավոր մետր հեռու գտնվող ոսկու հանքը,

ինչո՞ւ Երեւանը վերածվեց աղբանոցի եւ առնետանոցի,

ինչո՞ւ չկան օտարերկրյա մեծածավալ ներդրումներ,

ինչո՞ւ չպատժվեցին Հայ Առաքելական Եկեղեցու դեմ ստոր արշավի կազմակերպիչներն ու մասնակիցները,

ինչո՞ւ պաշտոնանկ չարվեց դպրոցից քահանային դուրս հրավիրած ԿԳ նախարարը,

ինչո՞ւ փորձ արվեց 3-5 տարեկան երեխաներին սեռական կյանքի մասին կասկածելի տեղեկություններ տրամադրել,

ինչո՞ւ է կառավարությունը շտապում վավերացնել Ստամբուլյան կոնվենցիան,

ինչո՞ւ Երեւանի քաղաքապետի պաշտոնից չի հեռացվում Հայկ Մարությանը, որը ոչ միայն չմաքրեց Երեւանը, այլ չլուծեց տրանսպորտի հարցը, չփոխեց վերելակները եւ ոչինչ չարեց պոլիկլինիկաների շենքերի նորոգման համար:

Եւ հենց այս հարցերը կստանան իրենց պատասխանները եւ լուծումները, պատրաստ ենք սեփական միջոցներով նորոգել եւ կարգի գցել Երեւանի դեկորատիվ ժամացույցները:

Հակոբ Ասատրյան

Top-News.am