Նրանք Նիկոլ Փաշինյանի աջակիցներն են

Մեր համար արդեն սովորական դարձավ, հասարակությունը, կարծես թե, հաշտվեց այն իրողության հետ, որ սոցիալական ցանցում կարող են անիծել, հայհոյել Նիկոլ Փաշինյանին քննադատողներին եւ կառավարության գծից շեղվողներին:

Ամենաստոր հայհոյանքները, որն իրեն հարգող տղամարդը երբեք չի արտասանի, գրում են , իրենց թույլ են տալիս Նիկոլ Փաշինյանի ջերմեռանդ աջակիցները՝ թաքնվելով համակարգչի հետեւում եւ կեղծ անուն-ազգանուններով:

Ամենանողկալի անեծքները, որ իրեն կարող է թույլ տալ միայն ամենաստոր կինը, ամենամերժված կինը գրում են Նիկոլ Փաշինյանի պաշտպանները:

Այս ամենի մասին բազմաթիվ անգամ գրվեց, խոսվեց, բայց ոչինչ չփոխվեց: Մնացին նույն հայհոյանքները, մնացին նույն անեծքները: 

Այս պատմության մեջ ամենավատն այն է, որ վարչապետը, նրա թիմակից նախարարները եւ պատգամավորները որեւէ անգամ իրենց աջակիցներին կոչ չարեցին վերջ տալ նման պահվածքին, չփորձեցին բացատրել, որ այս կերպ, այս գրառումներով գցում են նաեւ իշխանությունների վարկանիշը:

Ստացվեց այնպես, որ հետհեղափոխական «հաջողությունների» շարքում կարելի է արձանագրել նաեւ սոցցանցերում լայնորեն կիրառվող անեծքներն ու հայհոյանքները: Մենք կարող ենք մտածել, որ սա իշխանությունների համար ձեռք բերում է, քանի որ մատը մատին չխփեցին այս զզվելի եւ գարշելի գրառումներից համացանցն ազատելու համար:

Եւ մենք այքանից հետո կարող ենք եզրակացնել, հասկանալ, թե ովքեր են այսօր Նիկոլ Փաշինյանի եւ նրա թիմակիցների աջակիցները:

Հակոբ Ասատրյան

Top-News.am