Լուլուի գործը կամ լայն փակված աչքերով

X ժամանակ հետո

ՀՀ հատուկ քննչական ծառայությունում քննվող քրեական գործի շրջանակներում վատնման եղանակով խոշոր եւ առանձնապես խոշոր չափերի գույքի հափշտակությանն օժանդակելու կասկածանքով ձերբակալվել է Լուսինե Բադալյանը, որն հանրությանը հայտնի է Լուլու մականունով: 

Ինչպես հայտնում են ՀՀ հատուկ քննչական ծառայությունից, վերջինս կասկածվում է ՀՀ քրեական օրենսգրքի մի շարք հոդվածներով նախատեսված այն հանցավոր արարքների կատարման մեջ, որ 2019թ-ին, լինելով ԱԺ պատգամավոր, Վարդավառի տոնից առաջ հանցավոր համաձայնության է եկել ոմն Գ.Ա.-ի, ԱԺ պատգամավոր Հ.Գ.-ի եւ իր մտերիմ ընկերուհի Մ.Ս-ի հետ եւ որոշել տոնն օգտագործել առանձնապես խոշոր չափերի յուրացում կատարելու համար:

Զբաղեցնելով ՀՀ ԱԺ պատգամավորի աթոռը, օգտագործելով իր ունեցած ծառայողական դիրքը եւ դրանից բխող ազդեցությունն ու կապերը, հաջողացրել է անցկացված մրցույթում հաղթող դարձնել, ըստ ՀՀ կառավարության էլեկտրոնային ռեգիստրում ներկայացված տվյալների՝ Վարդավառի տոնակատարությունից (28-08-2019) ընդամենը 5 օր առաջ՝ 2019 թ. հուլիսի 23-ին գրանցված «ՄԵՐԻ ՍՈԼՈՅԱՆ ԱԼԲԵՐՏԻ Ա/Ձ»-ին:

Կատարված լայնածավալ աշխատանքների արդյունքում եւ Լուսինե Բադալյանի, ինչպես նաեւ Մ.Ս.-ի տված ցուցմունքներից պարզ է դարձել, որ տոնակատարության համար հատկացվել է մոտ 5 մլն դրամ՝ 4 մլն 941 հզր ՀՀ դրամ, որից իրականում ծախսվել է ընդամենը 100 հազար դրամ, իսկ մնացածը յուրացրել են վերոնշյալները՝ պետությանը պատճառելով առանձնապես խոշոր չափի վնաս: 

Նախաքննությունը շարունակվում է: Միջոցներ են ձեռնարկվում հանցագործությունների կատարմանը ներգրավված անձանց ողջ շրջանակը պարզելու ուղղությամբ:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Մեր ժամանակներ

Այսպես կարող է լինել, եթե հաջորդ իշխանությունները գործեն ներկա իշխանությունների տրամաբանության շրջանակում եւ ցանկանան երկիրն անվերջ պահել դատական քաշքշուկների մեջ: Այսպես կարող է լինել եւ խափանման միջոցը որպես կալանք ընտրելու որոշումն էլ կկայացնի այն դատավորը, որը հիմա հաճույքով կատարում է գործող իշխանությունների ցանկությունը, իսկ գործն էլ կքննեն այն դատախազները, որոնք այսօր գործ են «կարում»:

Մենք չենք ուզում այսպես լինի, բայց կարող է լինել: Եւ չմոռանաք, որ ստալինիզմի անկումից հետո բանտերում հայտնվեցին գործ «կարող» քննիչներն ու դատախազները, ապօրինի դատավճիռներ կայացրած դատավորները:

x ժամանակ հետո

Մամուլի տեսություն. Y թերթը գրում է. «Այս գործը հիշեցնում է ժամանակին Արմեն Աշոտյանի վարորդի դեմ հարուցված քրգործը: եթե այն ժամանակ կարող էր լինել, ապա ինչու հիմա չի կարող լինել»:

Հ.Գ. Նյութում օգտագործված անունները հորինովի են, բոլոր համընկնումները պատահականություն են: Նյութի լուսանկարը եւս ընտրվել է պատահականության սկզբունքով: 

Top-News.am-ի հումորի բաժին