Սեդա Սաֆարյան՝ փաստաբան, թե՞ ...

BBC-ի ռուսական ծառայության «մարտի մեկի» վերաբերյալ սկանդալային հրապարակումից հետո Հայաստանում մի պահ դադար էր. հասարակությունը փորձում էր հասկանալ, թե ո՞վ է կանգնած այս խայտառակ հրապարակման հետեւում, ո՞վ է այս ամենից շահելու, եւ կամ տեղեկատվության աղբյուրն իրական է, թե հորինովի: Աղմկում էր միայն Ստյոպա Սաֆարյանը, աղաղակելով, թե սա դեռ սկիզբն է, եւ որ դեռ այլ մեղադրանքներ եւս կլինեն:

Ստյոպա Սաֆարյանը փաստաբան Սեդա Սաֆարյանի եղբայրն է: Մնում է կռահել, որ եղբոր եւ քրոջ միջեւ մտերմիկ զրույցներից մեկում տեղեկատվության արտահասք է եղել, բայց այստեղ արդեն մեկ այլ հարց է առաջանում, թե Սեդա Սաֆարյանը փաստաբան է, թե՞ համատեղության կարգով նաեւ աշխատում է ՀՔԾ-ում կամ դատախազոսւթյունում:

Սեդա Սաֆարյանը BBC-ի ռուսական ծառայության հրապարակումից հետո լրատվամիջոցներից մեկին շտապեց հարցազրույց տալ եւ կրկին սկանդալային հայտարարություններ արեց, որը չի կարելի անուշադրության մատնել:

Սեդա Սաֆարյանը պնդում է, որ BBC-ի իրազեկության աղբյուրը շատ հստակ տվել է այն բոլոր տեղեկությունները, որոնք իրականություն են: Չմոռանանք, որ բրիտանական լրատվամիջոցի պնդմամբ իր աղբյուրը ՀՔԾ-ն է:

Հիմա ամենակարեւորը. Սեդա Սաֆարյանը պնդում է, այն էլ հաստատական տոնով, թե մարտի 1-ին Սամվել Կարապետյանը ունեցել է շատ մեծ դերակատարում: Տպավորություն է, որ ինչ-ինչ ուժերի հանձնարարականով Սեդա Սաֆարյանը համառորեն հետամուտ է լինում Արցախի ազատագրման հերոսներին հեղինակազրկելու եւ նրանց ծանր մեղադրանքներ բարդելու գործին:

Տպավորություն է, որ Սեդա Սաֆարյանը ոչ թե փաստաբան է, այլ X կենտրոնի աշխատակից, որի հիմնական նպատակը հայաստանյան հասարակության պառակտումն է, արցախյան հերոսներին հեղինակազրկելը եւ երկիրն անվերջ դատական քաշքշուկներում պահելը:

Սեդա Սաֆարյանն անդադար հիշատակում է ինչ-որ մարդկանց որոնք ցուցմունքներ են տվել: Նա դեռ չի հասկանում, որ այդ հնարքն արդեն իրեն սպառել է, եւ որ սարքովի գործը ջարդուփշուր է եղել: Իսկ գուցե հասկանում է, բայց հնարավոր պատվերի շրջանակում շարունակում իր հանձնարարականների կատարումը:

Հասարակությունը պետք է հատուկ ուշադրություն դարձնի, թե ինչ ջանասիրությամբ է Սեդա Սաֆարյանն անդադար երեւանցիներին, իջեւանցիներին, գյումրեցիներին կամ գորիսեցիներին տրամադրում արցախցիների նկատմամբ:

Ավելին, Սեդա Սաֆարյանն անգամ չի դիմանում եւ ՀՔԾ-ին կոչ է անում «որոշ մարդկանց արժանի գնահատական տալ»: Կարելի է պատկերացնել, թե ինչ երջանիկ կլիներ Սեդա Սաֆարյանը եթե ապրեր 1937-ին: Դժվար չէ կռահել, թե քանի-քանի ժողովրդի թշնամի նա կհայտնաբերեր եւ կդատապարտեր գնդակահարության կամ աքսորի:

Այս կինը, որ իբր թե փաստաբան է, ՀՔԾ-ին ուղիղ կոչ է անում քրեական գործեր հարուցել արցախցի ներկա եւ նախկին այլ պաշտոնյաների նկատմամբ, հաշվի չառնելով, թե դա ինչ հետեւանքներ կունենա Արցախի համար: 

Կարծում ենք, վաղ թե ուշ Սեդա Սաֆարյանն անպայման պետք է պատասխան տա իր անպատասխանատու հայտարարությունների, ներկայացրած մեղադրանքների համար: Սամվել Կարապետյանը պնդում է, որ մարտի 1-ին եղել են կառավարության շենքում, ոչ կրակել են, ոչ մոտ եղել կրակոցներին, իսկ Սեդա Սաֆարյանը հայտարարում է, թե Օգանովսկու կրակելու հրամանի հետ կապված կան որոշակի անձանց ցուցմունքներ, որ, այո՛, ժողովրդի վրա կրակել են:

Հետաքրքիր է ովքեր են այդ անձիք: Գուցե նրանց Սեդա Սաֆարյանն իր հետ հեռավոր 1937-ից բերել: Լավ, մինչեւ երբ ենք հանդուրժելու այս իրավիճակը, երբ կասկածելի ցուցմունքներով մարդիկ կալանավորվում են, քրեական գործեր հարուցում: Այսպես մենք երկիր կկործանենք: 

Վերջին հաշվով ով ասես, ինչ ցուցմունք ասես կարող է տալ, բայց իրավապահ մարմինների դերն էլ նա է, որ հասկանան, պարզեն, թե այդ ցուցմունք տվողն ինչ շարժառիթներով կամ ինչ հիմքերով է նման հայտարարություն տալիս: Կրկին հենվելով ինչ-ինչ ցուցմունքների վրա Սեդա Սաֆարյանը հայտարարում է, թե 12 հոգանոց խումբը ժողովրդի վրա կրակել է:

Հիմա Սեդա Սաֆարյանի մեկ այլ վտանգավոր, կարելի է ասել հանցավոր հայտարարություն: «Հետևաբար՝ ես կարծում եմ, որ ՀՔԾ-ն պետք է շատ նշանակություն չտա փորձաքննությունների հետևություններին»: Եւ այս հայտարարությունն անում է մի կին, ով իբր փաստաբան է: Նա ուղիղ կոչ է անում թքած ունենալ օրենքի, օրինականության վրա եւ ազատազրկել մարդկանց միայն նրա համար, որ ինքն ու իր տերերն են այդպես ցանկանում:

Անգամ երբ լրագրողն ասում է, որ զոհերից եւ ոչ մեկը կրակոցից չի զոհվել, Սեդա Սաֆարյանը կրկին զարկ է տալիս երեւակայությանը եւ արդեն ասում կամ ՀՔԾ-ին հասկացնում, որ անգամ կարելի է պնդել, որ Կարապետյանն ու իր խումբն ունեցել են Չերյոմուխա տեսակի զենք:  

Սա արդեն ոչ թե խայտառակություն է, այլ մեր երկրի ամոթը: Սա արդեն շատ վտանգավոր է: Երբ ցինիզմը մուտքէ է գործում նաեւ այս ոլորտ, ապա հետեւանքները կարող են ավելի ծանր լինել քան պատկերացնում են ոմանք:

Սեդա Սաֆարյանը եւ նրա տերերը կարող են հազարավոր վկաներ բերել, որոնք կարող են հազարավոր անհեթեթ ցուցմունքներ տալ, բայց դրանից իրականությունն ու ճշմարտությունը չեն փոխվում: Սեդա Սաֆարյանը նաեւ պետք է որ հասկանա, որ օրերից մի օր հանրությանը, առնվազն հանրությանը պետք է բացատրի, թե ինչու էր այդպիսի համառությամբ փորձում վարկաբեկել Արցախի պատրեազմի հերոսներին:

Վարդան Մխիթարյան

Top-News.am