Փաշինյանը տեղյակ է, որ Մարտի 1-ին տանկի թրթուրների տակ ճզմված մարդիկ չեն եղել. Ալումյան

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը «չհաջողված հիպերբոլա» է համարում վարչապետի վերջին հարցազրույցներից մեկում նրա ձեւակերպումը, թե. «Ովքեր ասում են, որ Ռոբերտ Քոչարյանը քաղբանտարկյալ է, ասում են, որ ես իրավունք ունեմ զինված ուժերն ու տանկերը մտցնեմ Երեւան եւ ցանկացած ընդդիմադիր դրսեւորում ճնշեմ տանկի թրթուրների տակ»:

«Եթե վարչապետը մայրաքաղաք տանկեր մտնելու հետ կապված հիպերբոլա է օգտագործել միտքը ուժեղացնելու համար, ապա չհաջողված հիպերբոլա է, իսկ եթե պարոն Փաշինյանը իրոք կարծում է, որ Մարտի 1-ին տանկեր են մտել ու թրթուրների տակ մարդկանց են ճզմել, ապա պարոն Փաշինյանը երևի տանկ տեսած չկա, բայց գոնե ինքը տեղյակ է, որ թրթուրի տակ ճզմված մարդ չի եղել էդ իրադարձությունների ժամանակ, մնացածը ես էդ կարգի գաղափարները եկեք չմեկնաբանեմ»,- ասաց նա:

Փաստաբանը հավելեց, որ Փաշինյանի հայտարարությունների հետ կապված իրենք աշխատում են բանավեճի չբռնվել, քանի որ մեկ անգամ արդեն Փաշինյանը հրաժարվեց իր արտահայտությունից` ասելով, որ ինքը Քոչարյանին ի նկատի չի ունեցել` ասելով մարդասպան:

«Մենք դատի ենք տալու, Փաշինյանը գալու է, ասի` ես Քոչարյանին ի նկատի չեմ ունեցել, դրա համար մենք այս ոլորտում մեկնաբանություններ չունենք, նախապես ասում ենք` ինքը երեւի Քոչարյանին ի նկատի չի ունեցել»,- ասաց Ալումյանը:

Բաժանորդագրվեք Top-News.am-ին Telegram-ում