Թուրքիան հաստատել է С-400-ների դետալներով 4-րդ ռուսական ինքնաթիռի վայրէջքը երկրում

Թուրքիան հաստատել է С-400-ների դետալներով 4-րդ ռուսական ինքնաթիռի վայրէջքը երկրում

Թուրքիայի պաշտպանության նախարարությունը հաստատել է թուրքական «Մյուրթեդ» ավիաբազայում С-400 զենիթահրթիռային համալիրների բաղադրիչներով նոր խմբաքանակով 4-րդ ռուսական օդանավի վայրէջքը:

«С-400 զենիթահրթիռային համալիրների մատակարարումը վերսկսվել է այսօր: С-400-ների բաղադրիչներով չորրորդ ռուսական օդանավը վայրէջք է կատարել «Մյուրթեդ» ավիաբազայում»,- ասվում է երկրի պաշտպանության նախարարության թվիթերյան էջում:

Ինչպես ավելի վաղ հաղորդել էր Tert.am-ը, երեկ Թուրքիա է հասել ռուսական С-400 զենիթահրթիռային համալիրների բաղադրիչների առաջին խմբաքանակը: Դրանք տարվել են Անկարայի նահանգում գտնվող «Մյուրթեդ» ավիաբազա:

Ռուսական հակաօդային պաշտպանության համակարգերի գնումը ՆԱՏՕ-ի անդամ Թուրքիայի կողմից միջազգային սկանդալ է հրահրել. Միացյալ Նահանգները պահանջում է հրաժարվել գործարքից և փոխարենը ձեռք բերել ամերիկյան Patriot համակարգեր: Հրաժարվելու դեպքում Վաշինգտոնը հետևանքներով է սպառնացել:

Հիշեցնենք, որ Ռուսաստանի Դաշնության և Թուրքիայի միջև С-400 համակարգերի գնման շուրջ բանակցությունների մասին առաջին անգամ հայտնի էր դարձել 2016թ.-ի նոյեմբերին, իսկ վաճառքի մասին պայմանագիրը կնքվել էր 2017թ.-ի սեպտեմբերին, ընդ որում՝ ձեռք բերված զենիթահրթիռային 4 միավոր համակարգերի արժեքը 2,5 մլրդ դոլար է կազմել:

Հյուսիսատլանտյան դաշինքի մամուլի ծառայությունը երեկ հայտարարել է, որ ՆԱՏՕ-ն խորապես մտահոգված է Թուրքիա ռուսական С-400 զենիթահրթիռային համալիրների մատակարարման մասին հաղորդագրություններով: