Մոսկվայի մոտ Երևանի հանդեպ բացասական վերաբերմունք է կուտակվում. Տարասովը՝ Քոչարյանի կալանավորման մասին

«Ռուսաստանն իր դիրքորոշումը երբեք չի թաքցրել։ Այդ մասին խոսվել է արտգործնախարար Լավրովի մակարդակով, իսկ նախագահ Պուտինն այս ընթացքում շնորհավորանքներ է հղել Ռոբերտ Քոչարյանին, նրանք ունեն անձնական ջերմ հարաբերություններ։ Բնականաբար, ՀՀ երկրորդ նախագահին կալանավորելու որոշումը բացասական ազդեցություն կունենա հայ-ռուսական հարաբերությունների վրա»,- «Առաջին լրատվական»-ի հետ զրույցում, մեկնաբանելով Ռոբերտ Քոչարյանին կրկին կալանավորելու՝ ՀՀ վերաքննիչ քրեական դատարանի որոշումն, ասաց ռուսաստանցի քաղաքագետ Ստանիսլավ Տարասովը։

Մեր զրուցակիցն ընդգծեց. «Փաշինյանի քաղաքականությունը խնդրահարույց է, ապագային նայելու փոխարեն, չգիտես ինչու, հեղափոխական իշխանությունը անընդհատ հետ է նայում։ Քոչարյանին բանտ նստեցնելուց Հայաստանի վիճակը չի լավանա։ Պետք է հաշվի առնվի այն հանգամանքը, որ Քոչարյանը Ղարաբաղի առաջին, իսկ Հայաստանի երկրորդ նախագահն է, հիմա ի՞նչ, նախագահին խարդախ անվանելով՝ ինչի՞ եք հասնում։ Ի՞նչ է ստացվում դրանից, կարող է հետագայում էլ մյուս իշխանությունները նույն մեղադրանքը հասցնեն Փաշինյանին։ Սա շատ վատ նախադեպ է»։

Տարասովը նշեց, որ Մոսկվայում ակնկալիքներ են եղել, որ Հայաստանի նոր իշխանությունները երկիրը կդարձնեն ժողովրդավար և քաղաքակիրթ. «Հայաստանի Սահմանադրությամբ՝ նախագահն անձեռնմխելի է, և բոլորը պահում են այդ կանոնը։ Նույնիսկ Պորոշենկոն, որի ձեռքերն արյունոտ են՝ Կիևի իշխանությունները պահում են նրա անվտանգությունը, չնայած խոսվում է ինչ-որ մանր գործեր հարուցելու մասին»։

Քաղաքագետի կարծիքով՝ սա վատ նախադեպ է, որից Հայաստանը չի շահի. «Ի՞նչ են ուզում շահել անցյալը փորփրելով՝ դա վենդետա է, անձնական վրեժխնդրություն, որը շատ վատ է։ Գուցե Մոսկվայից պաշտոնական դիրքորոշումներ էլ լինեն, բայց ամեն դեպքում, փորձագետների կարծիքով, դա բացասական անդրադարձ կունենա»։

Տարասովը մեջբերեց վրացական իրադարձությունները և նշեց. «Դուք գիտեք, որ Մոսկվան շատ կտրուկ արձագանքեց, Երևանի հանդեպ էլ բացասական վերաբերմունք է կուտակվում, թե ինչ կլինի ապագայում՝ դժվար է ասել, բայց Մոսկվայի և Երևանի միջև, անկասկած, բացասական մթնոլորտ կձևավորվի»։