Վահե Գրիգորյանի հայտարարությունն իշխանության մարմնի բռնազավթում է, քաղաքական պատասխանատվությունը կրելու է Նիկոլ Փաշինյանը․ քաղաքագետ

Սահմանադրական դատարանի շուրջ ստեղված իրավիճակում խնդիրն այն, թե ով իրավունք ունի օրենքը մեկնաբանել, քանի որ ցանկացած մարդ կարող է ասել, որ իր կարծիքով՝ այս օրենքը կամ Սահմանադրության դրույթն այսպես է և վերջ։ Tert.am-ի հետ զրույցում նման տեսակետ հայտնեց քաղաքագետ Ստեփան Դանիելյանն՝ անդրադառնալով ՍԴ անդամ ընտրված Վահե Գրիգորյանի՝ ԱԺ-ում արված հայտարարությանը։ Նա նկատեց, որ ցանկացած դատական պրոցեսի ժամանակ դատախազը, փաստաբանը տալիս են մեկնաբանություններ, բայց վճիռը կայացնում է դատավորը։

«Նույնն այս հարցում է՝ Սահմանադրության ցանկացած դրույթ ամեն մարդ կարող է իր ձևով մեկնաբանել, սակայն մեկնաբանության իրավունքը պատկանում է Սահմանադրական դատարանին և Սահմանադրական դատարանի անդամների միասնական որոշմանը։ Հիմա մի կողմից Վահե Գրիգորյանը կարող է իր ուզած ձևով մեկնաբանել, բայց մյուս կողմից, եթե ինքն ԱԺ ամբիոնում մեկնաբանում է և ասում, որ ինքը կընտրվի ՍԴ նախագահ, դա արդեն սովորական մեկնաբանություն չէ՝ սա իշխանության մարմնի բռնազավթում է։ Նույն ձև իշխանության կողմից Սահմանադրության խախտում է դատարանների դռները շրջափակելը։ Այսինքն՝ սա Սահմանադրական կարգի խախտում էր»,- շարունակեց նա։

Դանիելյանը վստահ է, որ գալու է պատասխանատվության ժամանակը, որովհետև, իրականում, Սահմանադրությունը մեկնաբանում է Սահմանադրական դատարանը։ Նրա կարծիքով՝ քաղաքական պատասխանատվությունը ՀՀ վարչապետ Նիկոլ Փաշինյանինն է։ Քաղաքագետը նկատեց, որ Փաշինյանը հույս ունի, որ կկարողանա կոծկել ու դուրս գալ ստեղված հակաօրինական վիճակից, բայց շեշտեց, որ մի օր էլ կգա Փաշինյանին պատասխանատվության ենթարկելու հարցը։

«Վարչապետ Նիկոլ Փաշինյանը հասկանում է, որ ինքն այս ամեն ինչի տակից դուրս կգա այնպես, ինչպես դուրս են եկել նախորդները, որովհետև այս 30 տարվա ընթացքում տեսել ենք անօրինականություններ։ Նիկոլ Փաշիյանը, իշխանության գալով, նախկինների համար պատասխանատվության ինստիտուտ դրեց, ինչից կարելի է ենթադրել, որ Նիկոլ Փաշինյանն էլ իր արածների համար պատասխանտվության կենթարկվի։ Փաշինյանը եկել է օրինականության խնդրով՝ արդարություն վերականգնելու, սահմանադրական կարգը վերականգնելու, օրենքով ապրելու կարգախոսներով և իր նկատմամբ այդ ամեն ինչը խիստ է լինելու, որովհետև ինքն է այդ կարգախոսները հռչակել։ Պատասխանատվություն կլինի այս անօրինականության համար, իրավական դեմագոգիայի համար, որն ինքը և իր կողմնակիցներն անում են։ Հնդկական կարմայի օրենքներով՝ հենց իր դրած ինստիտուտով պատասխանատվություն կկրի»,- ընդգծեց Ստեփան Դանիելյանը։

Քաղաքագետը դժվարանում է ասել, թե այս պահին խնդիրն ինչպես կհանգուցալուծվի, քանի որ ամեն բան, ըստ նրա, կապված Սահամանադրական դատարանի անդամների հետ։ Նա ցավով խոստովանեց, որ Հայաստանում շատ դատավորներ կամք չունեն իրենց տեսակետը, որն իրավական է, արտահայտելու։

«Հիմա Սահմանադրական դատարանի անդամները որքանով կամք կցուցաբերեն ես չեմ կարող ասել, դա արդեն կախված է իրենցից, բայց մի բան կարող ենք հստակ ասել, եթե մինչև հիմա շատ որոշումներ հանրային ճնշմամբ է եղել, հիմա կարող է այնպես լինել, որ հանրային ճնշումը հակառակն անի։ Այսինքն՝ հանրությունը կիսված է, իսկ մարդիկ ոչ թե օրինականությամբ են շարժվում, այլ քաղաքական հայացքներից ելնելով։ Այսինքն՝ մենք մտել ենք մի փուլ, որտեղ իրավական դաշտը քաղաքական հայացքներով է որոշվում, և ասեմ, որ սա միանշանակ չէ, որ հանրությունը գործող իշխանությանն արդեն սատարում է, սա արդեն ճեղքված հասարակություն է, և սա արդեն ուրիշ տեղ է գնում»,- հավելեց քաղաքագետը։

Միևնույն ժամանակ Ստեփան Դանիելյանը շեշտեց, որ Հայաստանում իրավական եղանակներով հարցեր լուծել հնարավոր չէ․ « Քաղաքական եղանակներով կարող են հարցերը լուծվել, իսկ քաղաքական եղանակները և գործիքները շատ լայն են, և դա ժամանակին շատ լավ դրսևորել է Նիկոլ Փաշինյանը և այդ գործիքները հարստացրել է»,- եզրափակեց Ստեփան Դանիելյանը։