Համանախագահները ներկայացրել են ԼՂ կարգավորման գործընթացում հետագա որոշակի քայլերի մասին առաջարկներ

ԵԱՀԿ Մինսկի խմբի համանախագահները (Իգոր Պոպով՝ Ռուսաստան, Ստեֆան Վիսկոնտի՝ Ֆրանսիա, Էնդրյու Շեֆեր՝ ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրշիկը մայիսի 27-30-ը տարածաշրջան կատարած այցից հետո հանդես են եկել համատեղ հայտարարությամբ:

Ինչպես նշվում է ԵԱՀԿ կայքում, համանախագահները մայիսի 27-ին Երևանում հանդիպել են ՀՀ վարչապետ Նիկոլ Փաշինյանի և մայիսի 30-ին Բաքվում Ադրբեջանի նախագահ Իլհամ Ալիևի հետ: Երկու մայրաքաղաքում էլ նրանք խորհրդակցություններ են անցկացրել ԱԳ նախարարների և պաշտպանության նախարարների հետ: Մայիսի 28-ին համանախագահները հանդիպում են ունեցել Լեռնային Ղարաբաղի դե ֆակտո իշխանությունների հետ:

«Մեր այցելության գլխավոր նպատակը շփման գծում և սահմանում իրավիճակի գնահատումն էր, ինչպես նաև Վիեննայում մարտի 29-ին Ադրբեջանի նախագահի և ՀՀ վարչապետի անցկացրած քննարկումների շարունակությանը հետևելու հնարավորությունը»,- ասվում է համանախագահների հայտարարության մեջ:

Խնդրանքի համաձայն՝ համանախագահները ներկայացրել են կարգավորման գործընթացում հետագա որոշակի քայլերի մասին առաջարկները, այդ թվում և մարդասիրական և անվտանգության միջոցառումները:

«Հայաստանի և Ադրբեջանի ԱԳ նախարարներն ընդունել են առաջիկայում հանդիպելու համանախագահների առաջարկը՝ իրենց հովանու ներքո, և կայանալիք հանդիպման մանրամասների մասին կտեղեկացնեն համապատասխան ժամանակին»,- ասվում է հայտարարության մեջ:

Համանախագահները խորը մտահոգություն են հայտնել վերջերս գրանցված զոհերի առնչությամբ և կողմերին կոչ են արել առավելագույն զսպվածություն ցուցաբերել իրավիճակի սրումից խուսափելու համար: