Դատավորները չեն ցանկանում մոտ գալ «Քոչարյանի գործին»

Դատավոր Վարդան Գրիգորյանը եւս հրաժարվեց քննել, այսպես կոչված, մարտի 1-ի գործը: Սա աննախադեպ իրավիճակ է Հայաստանի դատաիրավական համակարգի պատմության ընթացքում:

Հիմա համակարգիչը որոշել է, որ գործը պետք է քննի դատավոր Դավիթ Գրիգորյանը: Մեծ է հավանականությունը, որ նա եւս չի ցանկանա մոտենալ այս գործին եւ դատական որոշում կայացնել Ռոբերտ Քոչարյանի, Արմեն Գեւորգյանի, Յուրի Խաչատուրովի եւ Սեյրան Օհանյանի նկատմամբ: Իսկ հավանականությունը մեծ է , քանի որ նա հենց նույն Դավիթ Գրիգորյանն է, որը հրաժարվել էր քննել երկրորդ նախագահի կալանավորման հարցը:

Զավեշտն այն է, որ հրաժարվելու համար Գրիգորյանը կարգապահական պատասխանատվության է ենթարկվել: Իսկ թե ինչ պատասխանատվություն կլինի, կիմանանք միայն մայիսի 13-ին: Բացառված չէ, որ հնարավոր է դադարեցվի նրա լիզորությունը:

Այն, որ դատավորները խուսափում են այս գործից, պարզ է անգամ Հայաստանի ամենահեռավոր գյուղերի բնակիչներին եւ դպրոցականներին: Դատավորներին կարելի է հասկանալ: Նրանք չեն ցանկանում իրենց անցավ գլուխը դնել ցավի տակ: Որեւէ մեկի համար հաճելի չէ մասնակից լինել դատավորի կարգավիճակով խիստ քաղաքականացված գործի քննությանը, այն էլ այն գործի, որը շատ իրավաբանների կարծիքով պարզապես հորինված է:

Այս մթնոլորտում, երբ երկիրը բաժանված է սեւի եւ սպիտակի, երբ անգամ անմեղ գրառումը եւ հոդվածը դառնում է հարձակումների առիթ կամ պատճառ, դատավորները հասկանում են, թե ինչ են ապրելու, երբ, օրինակ, որոշեն, որ քննիչները գործը «կարել» են եւ արդարացնեն մեղադրյալներին:

Դատավորները նաեւ չեն ցանկանում ճնշումների տակ մեղադրական որոշումներ կայացնել, հասկանալով, որ դրա համար ամենամոտ ապագայում իրենք են կանգնելու դատարանի առաջ: Ի դեպ, դատավորները լսել են Նիկոլ Փաշինյանի այն հայտարարությունը, որ եթե պարզվի, որ «Քոչարյանի գործում» թերացումներ են եղել, մեղավորները կպատժվեն:

Սա է իրականությունը եւ սա է դատավորների հրաժարվելու միակ պատճառը: Սա է մեր երկրի այսօրվա իրականությունը:

Վահրամ Գեւորգյան

Top-News.am