Իմքայլական պատգամավորները տեղյակ չեն երկրի իրական վիճակի մասին

Երբ իմքայլական խրոխտ, հպարտ եւ անխոնջ պատգամավորը ելույթ է ունենում Ազգային ժողովում եւ հայտարարում, թե ՀՀ քաղաքացին այլեւս չի մտածում արտագաղթելու մասին, ապա նա կամ չի տիրապետում իրավիճակին կամ միտումնավոր խեղաթյուրում է իրականությունը:

Անկեղծ լինենք, եւ մեկի եւ մյուսի դեպքում մենք գործ ունենք իր պարտականությունները շատ վատ կատարող պատգամավորի հետ: Ցավոք, սա եզակի երեւույթ չէ: Առանձին բացառություններով իմքայլականները կամ խեղաթյուրում են իրականությունը կամ տեղյակ չեն իրականությունից:

Ինչ վերաբերում է արտագաղթին, ապա օրերս հրապարակվեց Գելափի հարցման արդյունքներն աշխարհի տարբեր երկրներում եւ պարզվեց հայաստանցիների մոտ կեսը առաջին իսկ հնարավորության դեպքում պատրաստ է արտագաղթել: Այս ցուցանիշով մենք աշխարհում առաջատարներից ենք:

«Ռուսաստանի սոցիալական վերլուծությունների եւ կանխատեսումների ինստիտուտն էլ հրապարակել է 2018թ. վերլուծությունների արդյունքները, ըստ որի՝ անցյալ տարի ներգաղթյալների թիվը ամենափոքրն է եղել հետխորհրդային շրջանում:

Հետաքրքիրն այն է, որ ներգաղթյալների թիվը պակասել է բոլոր ուղղություններով՝ բացառությամբ Հայաստանի, Ադրբեջանի եւ Թուրքմենստանի: 

Դե հիմա շարունակեք կրկնել, որ ՀՀ հպարտ քաղաքացին այլեւս չի մտածում արտագաղթի մասին: Կրկնեք, որ կոռուպցիա չկա, որ մենաշնորհներ չկան: Կրկնեք որքան ուզում եք, բայց հալվա, հալվա ասելով բերանը չի քաղցրանում:

Հակոբ Ասատրյան

Top-News.am