Շվեյցարիան նույնպես Թուրքիային կասկածում է լրտեսության համար

Գերմանիայից հետո այժմ էլ Շվեյցարիայում թուրքական հյուպատոսություններին են կասկածում տեղի թուրքերի հանդեպ լրտեսություն անելու համար, այս մասին գրում է թուրքական «Ջումհուրիյեթ» պարբերականը:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում:

Թուրքական պարբերականը նշում է, որ շվեյցարական պետական ռադիոկայանի եթերում հեռարձակված հաղորդումներից մեկի ընթացքում լրագրողը հայտնել է, որ Թուրքիան փորձում է վերահսկողության տակ պահել և լրտեսել թուրքական ծագմամբ Շվեյցարիայի այն քաղաքացիներին, որոնք որևէ կապ ունեն «Հիզմեթ»-ի հետ:

Ինչպես ավելի վաղ հայտնել է Tert.am-ը՝ Գերմանիայի դաշնային դատախազությունը հատուկ հետաքննություն է սկսել Թուրքիայի կողմից Գերմանիայի քաղաքացի հանդիսացող թուրքերի հանդեպ լրտեսության դեպքերի առնչությամբ:

Իրավիճակը մեկնաբանած Գերմանիայի ներքին գործերի նախարար Թոմաս դե Մեզյերը նշել է, որ երկրի տարածքում երկրի քաղաքացիների հանդեպ այլ երկրի մարմինների կողմից լրտեսության իրականացումն իրենց համար անթույլատելի է:

Tert.am