Թարմ մրգերն ու բանջարեղենը ոչ միշտ են սառեցվածից ավելի օգտակար. գիտնականներ

Թարմ մրգերն ու բանջարեղենը ոչ միշտ են սառեցվածից ավելի օգտակար. որոշ դեպքերում սառեցվածները նույնիսկ ավելի շատ սնուցող նյութեր են պարունակում, քան թարմերը: Այս մասին հայտնել են Ջորջիա նահանգի համալսարանի գիտնականները:

Հետազոտության շրջանակներում, որը հրապարակվել է Journal of Food Composition and Analysis ամսագրում, գիտնականները ստուգել են հանրահայտ բուսական մթերքների վիտամինային հագեցվածությունը: Մի կողմից եղել են թարմ պտուղներ, որոնք քաղվել են ամիջապես ծառերից կամ մարգերից եւ մի քանի օր պահվել սառնարանում, իսկ մյուս կողմից` սառեցված պտուղներ:

Գիտնականները 2 տարի շարունակ վերլուծել են նմուշներում C վիտամինի, A պրովիտամինի եւ ֆոլաթթվի խտության մակարդակը: Մթերքներից ներկայացվել են սառեցված եւ թարմ բրոկոլի, ծաղկակաղամբ, եգիպտացորեն, կանաչ լոբի, կանաչ ոլոռ, սպանախ, հապալաս եւ ելակ: Թարմ նմուշները սառնարանում են պահվել 5 օր` թարմ բանջարեղենը եւ մրգերը միջինում այսքան են պահվում սուպերմարկետների խցիկներում:

Արդյունքում նախագծի հեղինակները համոզվել են, որ օգտակար նուտրիենտների պարունակության ծավալով սառեցված եւ թարմ բանջարեղենն ու մրգերը միմյանցից չեն տարբերվում:

Այդուհանդերձ, առողջության համար օգտակարության առաջատարությունը գիտնականները տվել են սառեցված մթերքներին, քանի որ պարզվել է, որ դրանց մեջ վիտամիններն զգալիորեն ավելի շատ են, քան թարմ, բայց 5 օր սառնարանում պահված մրգերում եւ բանջարեղենում: Բանն այն է, որ սառնարանում երկար պահված թարմ մրգերը, բանջարեղենը եւ հատապտուղները օգտակար շատ հատկություններից զրկվում են, մինչդեռ արագ սառեցման դեպքում դա տեղի չի ունենում:

NEWS.am Medicine