Ուկրաինայում Լեհաստանի հյուպատոսարանը նռնականետով գնդակոծվել է
Ուկրաինայի Լուցկ քաղաքի լեհական հյուպատոսարանը այս գիշեր գնդակոծվել է նռնականետից։ Ինչպես հաղորդում է BBC-ն՝ այս մասին հայտարարել է փոխհյուպատոս Քշիշտոֆ Սավիցկին։
Նա նշել է, որ տարածքում, որի վրա կրակել են, մարդիկ են եղել, բայց «նրանց փրկել է այն, որ կրակոցը պատուհանից 20սմ վերեւ է եղել», ոչ ոք չի տուժել։
Պայթյունի արդյունքում տարածքի տանիքին 2-3 մետր տրամագծով ճեղք է գոյացել։
Դեպքի վայրում աշխատում է քննչական խումբը։ Շենքի պահակախմբի աշխատակիցները հաղորդել են, որ երկու պայթյուն են լսել։
Դեպքի առթիվ Ուկրաինայի դեսպանին կանչել են Լեհաստանի ԱԳՆ։ Կիեւում Լեհաստանի դեսպանատունը, իր հերթին, բողոքի նոտա է ուղարկելու Ուկրաինայի ԱԳՆ–ին։