Եվրախորհրդարանում Ուկրաինայի քաղաքացիների համար վիզաների վերացման հարցով քվեարկությունը կկայանա ապրիլի 6-ին
Եվրախորհրդարանը Ստրասբուրգում ապրիլի 6-ին լիագումար նիստի ժամանակ կքվեարկի Ուկրաինայի քաղաքացիների համար վիզաների վերացման հարցով: Այդ մասին «ՌԻԱ Նովոստի»-ին հայտնել է եվրոպական ասամբլեայում աղբյուրը:
«Քվեարկությունը, ինչպես սպասվում է, կկայանա ապրիլի վեցին, իսկ քննարկումները կանցկացվեն մեկ օր առաջ»,- ասել է գործակալության զրուցակիցը:
Անցած շաբաթ Հարևանության և ընդլայնման քաղաքականության հարցերով եվրահանձնակատար Յոհանես Հանը հայտարարել է, որ հուսով է՝ Ուկրաինայի քաղաքացիների համար առանց վիզայի ռեժիմն ուժի մեջ կմտնի մինչև այս տարվա ամառ՝ ԵՄ խորհրդի և Եվրախորհրդարանի որոշումների կայացման ընթացակարգերի ավարտից հետո:
Եվրախորհրդարանի քաղաքացիական ազատությունների, արդարադատության և ներքին հարցերով հանձնաժողովն ավելի վաղ քվեարկել է Ուկրաինայի քաղաքացիների համար կարճաժամկետ վիզաների վերացման օգտին:
Ուկրաինային առանց վիզայի ռեժիմ տրամադրելու մասին որոշման կայացումը բազմիցս հետաձգվել է: Կիևը հույս ուներ ստանալ այն մինչև 2016 թվականի ավարտ, բայց դա տեղի չունեցավ: Եվրահանձնաժողովի նախագահ Ժան-Կլոդ Յունկերն ավելի վաղ հայտարարել է, որ Եվրամիությունը մինչև ամառ կսահմանի առանց վիզայի ռեժիմ Ուկրաինայի քաղաքացիների համար: