Էստոնիայում կոմունիզմի զոհերի հուշակոթող կտեղադրվի
Էստոնիայում, 2018 թվականին, կոմունիզմի զոհերի հուշարձան կտեղադրվի։ Այս մասին, ինչպես հաղորդում է Ինտերֆաքսը, պատմել է արդարադատության նախարար Ուրմաս Ռեյնսալուն՝ Էստոնացիներին Սիբիր աքսորելու տարելիցին նվիրված միջոցարռման ժամանակ։
«1949 թվականի մարտի աքսորը հանցավոր եղեռնագործություն էր մեր ժողովրդի դեմ։ Մենք երբեք չենք մոռանա զոհերին, պետք է հիշենք նաեւ մարդկության դեմ հանցագործներին։ Մյուս տարի մենք կբացենք կոմունիզմի զոհերի «Մաարյանյաէ» հուշակոթողը, որտեղ փորագրված կլինեն բոլոր զոհերի անունները»,– հայտարարել է նախարարը։
2008 թվականին, երկրի այն ժամանակվա նախագահ Թոմաս Հենդրիկ Իլվեսը` էստոնացիների աքսորը ցեղասպանություն եւ մարդկության նկատմամբ հանցագործություն էր անվանել։
1949 թվականի մարտի 25-29-ին, ԽՍՀՄ նախարարների խորհրդի որոշմամբ, ավելի քան 22 հազար էստոնացիներ, այդ թվում՝ կանայք, ծերեր եւ երեխաներ, Էստոնիայից աքսորվեցին Կրասնոյարսկի, Նովոսիբիրսկի, Իրկուտսկի եւ Օմսկի մարզեր։