ՀՀԿ-ի պատկերացրած ընտրությունները

Գրեթե ամեն օր նախընտրական քարոզարշավի շրջանակներում արձանագրվում է դանակահարության, ծեծի, հրազենի գործադրման հերթական միջադեպը։ Ընդ որում, ինչպես ցույց է տալիս վիճակագրությունը, դեպքերի գերակշիռ մեծամասնության հրահրողները կազմակերպիչներն ու իրականացնողները ՀՀԿ-ականներն են, ՀՀԿ շտաբի անդամներ, ՀՀԿ ռեյտինգային ցուցակով առաջադրված թեկնածուների «մարդիկ»։ Իսկ վերջին շրջանում ՀՀԿ-ականների հարձակումների հիմնական թիրախը ԲՀԿ-ն է ու ԲՀԿ-ական թեկնածուները։

Իրավապաշտպան Ժաննա Ալեքսանյանի խոսքերով՝ այս այրունահեղությունը, ծեծուջարդը Հանրապետական կուսակցության հիմնական ձեռագիրն է և ընտրություն անցկացնելու նրանց հիմնական ձևը։ «Այն միտումը, որով փորձ է արվում կոծկել և ցույց չտալ, որ այդ դեպքերի հիմնական մասը կապված է ընտրությունների հետ, խոսում է այն մասին, որ դրանով փորձ է արվում պահպանել անպատժելիության մթնոլորտը։ Հենց սա է պատճառը, որ մեկը մյուսին հաջորդող դեպքերը ավելի բարբարոսական են, ավելի բռնի են։ Օրինակ, Արագածոտնի մարզի թեկնածուն հիմա ծայրահեղ ծանր վիճակում է»,- ասաց իրավապաշտպանը։

Տիկին Ալեքսանյանի խոսքերով՝ անպատժելիության մթնոլորտի վառ ապացույց է նաև այն փաստը, որ մինչ օրս դեպքերից որևէ մեկի ժամանակ չի եղել որևէ հրապարակային դատապարտող հայտարարություն, հրապարակային, օբյեկտիվ քննության կոչ։ Մենք չտեսանք երկրի նախագահի զսպումը, սաստումը նույն Լևոն Երանոսյանի ու նրա եղբոր նկատմամբ։ Սա փաստում է, որ իրենք չեն պատրաստվում փոխել իրենց ոճը։ Ավելին, լուռ համաձայնություն կա կատարվողի նկատմամբ»,- հավելեց տիկին Ալեքսանյանը։

Իրավապաշտպանի խոսքերով՝ հետապնդումները հիմնականում ուղղված են ԲՀԿ-ի դեմ, քանի որ իրենք լավ հասկանում են, որ ԲՀԿ-ի ընտրազանգվածը շատ ավելի է, իսկ իրենց նկատմամբ վերաբերմունքը բոլորին է հայտնի։ «Ես ենթադրում եմ, որ իրենք հասկանում են, թե ինչ համբավ ունեն ՀՀ-ում և ընտրությունների օրը ինչ ձայներ կարող են հավաքել։ Իրենք երկիրը հասցրել են ծայրաստիճան աղքատության և ժողովուրդը մի կտոր հացի փողի համար էլ գնում է Ծառուկյանի հետևից։ Դրա համար էլ հիմա ՀՀԿ-ականները սևեռվել են ԲՀԿ-ի վրա։ Գուցե նաև անվստահություն ունեն, որ ԲՀԿ-ն ընտրություններից հետո իրենց հետ կոալիցիա չի կազմի։ Այս դեպքերը սա են ցույց տալիս։ Իսկ ՀՀԿ-ն իր բռնի մեթոդներով փորձում է կյանքի կոչել իր նախապես մշակած պլանը»,- ասաց Ալեքսանյանը։

Իրավապաշտպան Վարդան Հարությունյանի խոսքերով՝ Հայաստանի իշխանությունները ընտրական գործընթացները մշտապես դիտարկել են որպես սեփական վերարտադրության միջոց, և այդ ճանապարհին ոչնչի առաջ կանգ չեն առել։ «Ե՛վ դանակահարություններ, և՛ կրակոցներ, և՛ քվեատուփի գողություն, ամեն ինչ եղել է։ Մենք տեսել ենք, որ մտել են տեղամաս ավտոմատներով և կրակել են։ Հետո մենք երկար տարիներ տեսել ենք, որ ավտոմատներով մտել են տեղամաս և չեն կրակել, իսկ հիմա կրակում են։ Այսինքն՝ մենք վերադառնում ենք 90-ականների երկրորդ կես։ Սա է իրականությունը»,- ասաց Հարությունյանը։

Իրավապաշտպանի խոսքերով՝ իշխանությունները վերադառնում են 90-ականների երկրորդ կես ոչ թե նրա համար, որ վախենում են պարտվել, այլ այն պատճառով, որ նրանք այդպես են պատկերացնում աշխարհը, այդպես են պատկերացնում ընտրությունները, քաղաքականությունը։ «Դա իրենց կյանքն է»,- ասաց իրավապաշտպանը։

Վարդան Հարությունյանի դիտարկմամբ՝ մենք հերթական անգամ ունենալու ենք կեղծված և արատավորված ընտրություններ, իսկ ընտրությունների օրը չի բացառվում, որ լինեն շատ ավելի մեծ էքսցեսներ և ականատես լինենք շատ ավելի ծանր դեպքերի, անկախ նրանից, որ Հայաստանը լուրջ քննություն ունի հանձնելու ԵՄ-ի հետ փաստաթուղթ ստարագրելու հարցում, որը մեծապես կախված է ապրիլին կայանալիք ընտրությունների որակից։ «Դա մեծ քննություն է մեր աչքին։ Այս իշխանությունների աչքին դա մեծ քննություն չի, դրանք իրենց համար սովորական առօրյա կյանք է, որը պետք է շրջանցել որևէ կերպ։ Եվ այս իշխանությունները կշրջանցեն հաստատ»,- նկատեց Վարդան Հարությունյանը։

1in.am