NASA-ն խոստացել է ամերիկացիներին Լուսին վերադարձնել

NASA-ն արագացնում է ամերիկացիներին Լուսին վերադարձնելու ծրագրերը: ԱՄՆ տիեզերական գործակալությունն այս անգամ հայտարարել է, որ այնտեղ կմնա, փոխանցում է AFP-ն:

NASA-ի ադմինիստրատոր Ջիմ Բրիդենսթայնը լրագրողներին ասել է, որ գործակալությունը նախատեսում է նախագահ Դոնալդ Թրամփի աջակցությամբ արագացնել Լուսին վերադառնալու ծրագրերը՝ օգտագործելով մասնավոր ընկերություններին:

Նա հույս է հայտնել, որ ամերիկացի տիեզերագնացները Լուսին կվերադառնան 2028 թվականին: «Այս անգամ, երբ ուղեւորվենք Լուսին, մենք այնտեղ կմնանք: Մենք չեն պատրաստվում դրոշներ եւ հետքեր թողնել, այնուհետեւ հետ՝ տուն թռչել, որ հաջորդ 50 տարիներին այնտեղ չվերադառնանք»,- ասել է նա:

Վերջին մարդը, որը եղել է Լուսնի վրա՝ Յուջին Սերնանն է՝ 1972 թվականի դեկտեմբերին «Ապոլլոն-17»-ի առաքելության ժամանակ:

Մինչեւ Լուսնի մակերեւույթին մարդկանց վայրէջք կատարելը, NASA-ն նախատեսում է 2024 թվականին Լուսին ուղարկել անօդաչու սարք եւ արդեն մասնավոր հատվածից զոնդի ստեղծման հայտեր է ընդունում: Հայտերի ընդունման վերջնաժամկետը մարտի 25-ն է, իսկ առաջին ընտրությունը նշանակված է մայիսին:

Այս արագացված ծրագրերը կոնկրետացնում են 2017-ի դեկտեմբերին Թրամփի ստորագրած տիեզերական քաղաքականության հրահանգը, որը նախատեսում է Լուսին վերադարձ, հնարավոր է, 2030 թվականին:

NASA-ն ծրագրում է 2026 թվականին Լուսնի ուղեծրում ոչ մեծ տիեզերակայան կառուցել, որը կկոչվի Gateway: Այն միջանկյալ կայանի դեր կկատարի Լուսնի մակերեւույթ թռչելու եւ այնտեղից վերադառնալու համար, սակայն մշտական անձնակազմ չի ունենա, ինչպես Միջազգային տիեզերակայանը: