Անգամ քննչական մարմինը չի համարում, որ մարտի 1-ի առավոտյան Ռոբերտ Քոչարյանը ուժ կիրառելու ցուցում է տվել. Ալումյան

Անգամ քննչական մարմինը չի համարում, որ մարտի 1-ի առավոտյան Ռոբերտ Քոչարյանը ցուցում է տվել, որ Ազատության հրապարակում գտնվողների նկատմամբ կիրառվի ուժ. նման բան պարոն Քոչարյանին մեղասգրված չէ: Այս մասին, այսօր՝ փետրվարի 9-ին, մամուլի ասուլիսի ժամանակ նշեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:

«Ում հրահանգով է տեղում ուժ կիրառվել, ես հիմա չասեմ, որովհետեւ այդ տեղեկությանը ես չեմ տիրապետում: Եթե ոստիկանության գործողություն կիրառելիս դիմադրություն են ցույց տալիս, ոստիկանությունը բոլոր դեպքերում իրավունք ունի կիրառել ուժ: Խնդիրն այն է, որ այդ ուժի կիրառումը պետք է լինի համաչափ»,-ասաց Ալումյանը:

Նա նկատեց, որ «Սաղաթելյանն ընդեմ Հայաստանի Հանրապետության» գործով Եվրոպական դատարանը չի գտել, որ ուժը կիարառվել է ոչ օրենքով, այլ գտել է, որ ուժի կիրառում եղել է անհամաչափ:

Նշենք, որ ՀՀ վերաքննիչ քրեական դատարանը՝ դատավոր Մնացական Հարությունյանի նախագահությամբ փետրվարի 7-ին որոշում էր կայացրել մերժել ՀՀ երկրորդ նախագահ Ռոբերտ Քոչարյանի պաշտպանների բողոքն ու անփոփոխ թողնել Քոչարյանի կալանքի ժամկետը երկարաձգելու առաջին ատյանի դատարանի որոշումը։

Հիշեցնենք, որ Երեւան քաղաքի ընդհանուր իրավասության դատարանի դատավոր Արթուր Մկրտչյանը հունվարի 18-ին բավարարել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ եւ մերժել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին: Այս որոշումը պաշտպանական կողմը բողոքարկել էր ՀՀ վերաքննիչ քրեական դատարանում։ Նշենք, որ Ռոբերտ Քոչարյանն առաջին անգամ կալանավորվել է 2018թ. հուլիսի 27-ին՝ Երեւան քաղաքի ընդհանուր իրավասության դատարանի դատավոր Վաչե Մարգարյանի որոշմամբ։ Օգոստոսի 13-ին այս որոշումը բեկանել էր Վերաքննիչ քրեական դատարանի դատավոր Ալեքսանդր Ազարյանը՝ արձանագրելով, որ երկրորդ նախագահն անձեռնմխելի է։ Վճռաբեկ դատարանն էլ գործն ուղարկել էր Վերաքննիչ դատարան՝ նոր քննության։

Քոչարյանը երկրորդ անգամ կալանավորվել է 2018թ. դեկտեմբերի 7-ին Վերաքննիչ քրեական դատարանի դատավոր Ռուբիկ Մխիթարյանի որոշմամբ։

Երկրորդ նախագահը «Մարտի մեկի» քրեական գործով մեղադրվում է ՀՀ սահմանադրական կարգը տապալելու համար: Սահմանադրական կարգը տապալելու համար մեղադրվում են նաեւ ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարարներ Միքայել Հարությունյանը եւ Սեյրան Օհանյանը։