Անցկացվել են ՊԲ ցուցադրական պարապմունքներ. Հաշվի է առնվել 2016 թվականի զարգացումները

ՊԲ-ի հարավ-արեւելյան ուղղությամբ գործող զորամասերից մեկի ուսումնանյութական բազայի հիմքի վրա, ԱՀ ՊՆ, ՊԲ հրամանատար, գեներալ-մայոր Կարեն Աբրահամյանի ղեկավարությամբ այսօր՝ հունվարի 30-ին, անց են կացվել ցուցադրական պարապմունքներ, որոնց ընթացքում միավորումների եւ զորամասերի հրամանատարական կազմին եւս մեկ անգամ ցուցադրվել են այն բոլոր գործողությունները, որոնք անհրաժեշտ է իրականացնել զորամասերը «բարձր» աստիճանների մարտական պատրաստականության վիճակի բերելու դեպքերում:

Սկսած զորամասի հերթապահի գործողություններից մինչեւ ստորաբաժանման անձնակազմի տագնապով վերկաց, զենքի եւ զինամթերքի ստացում, ապաստարանների եւ նստեցման շրջանների զբաղեցում, ինչպես նաեւ անձնակազմի եւ տեխնիկայի ընդունման կետերի ծավալում, շենք-շինությունների, զինվորական ունեցվածքի հանձնում-ընդունում, գործողություններ` ռազմական տեխնիկայի եւ սպառազինության հետ, միավորումների եւ զորամասերի վարչակազմերի անելիքների հստակեցում:

Ցուցադրական պարապմունքների ժամանակ վերադասի կողմից առավել մեծ ուշադրություն է դարձվել այն բոլոր հարցերին, որոնք ունեն գործնական ու կիրառական նշանակություն: Ըստ այդմ՝ հաշվի են առնվել ինչպես 2016 թվականի ապրիլյան դիմակայության ժամանակ արձանագրված զարգացումները, այնպես էլ այն բոլոր բեմագրերը, որոնք բխում են հակառակորդի հավանական գործողությունների բնույթից:

Վերջում բանակի հրամանատարը ամփոփել է արդյունքները եւ հանձնարարել ներկաներին անցկացված պարապմունքներից արված հետեւություններն ընդունել ի գիտություն եւ դրանցով առաջնորդվել առաջիկա ուսումնաշրջանում: