«Պարգևավճարները և դրանց տրման սկզբունքը պարունակում է կոռուպցիոն ռիսկեր». Սոնա Այվազյան

«Պետությունը պետք է գնա պարգևավճարների մինիմալիզացման և դրանց փոխարեն աշխատավարձի վարձատրման արժանապատիվ համակարգի ներդրման ուղղությամբ»,-այսօր տեղի ունեցած «Հակակոռուպցիոն օրակարգ Հայաստանի համար» քննարկման ընթացքում հայտարարեց «Թրանսփարենսի ինթերնեյշնլ» հակակոռուպցիոն կենտրոնի գործադիր տնօրեն Սոնա Այվազյանը:

Փորձագետի դիտարկմամբ կառավարության գործողությունները պետք է հասարակության համար ընկալելի լինեն, այլապես կստանան տարբեր մեկնաբանություններ:

ԹԻՀԿ ծրագրերի համակարգող Վարուժան Հոկտանյանն էլ նշեց՝ 2013-ի դեկտեմբերին կառավարության աշխատակազմում ստեղծվեց հակակոռուպցիոն մոնիթորինգի բաժինը»: Այս համակարգը, ըստ Հոկտանյանի տեղեկությունների, գործելու է վարչապետի աշխատակազմում:

Վերջինս կարևորում է վարչության վերանայման հարցը և ավելի շատ ռեսուրսների տրամադրումը դրա գործունեության համար:

Մեկ այլ խնդիր, ըստ ԹԻՀԿ ղեկավարի, իրական գնահատման և մոնիթորինգի համակարգի փաստացի բացակայությունն է:

Վարուժան Հոկտանյանը շեշտեց հանրային աջակցության և իրազեկության բարձրացման միջոցառումների կարևորությունը: Մանրամասնեց, որ համակարգային պայմաններում այդպիսի աջակցություն կգա, և կոռուպցիայի նկատմամբ անհանդուրժողական մթնոլորտի ձևավորում կլինի, երբ որ քաղաքացիները տեսնեն ու հասկանան, որ իսկապես լուրջ փոփոխություններ են կատարվում այդ պայմաններում: