Զուգահեռ տիեզերք

Տիեզերքը, հնարավոր է, անտիմատերիայից կազմված զուգահեռ աշխարհի «հայելային անդրադարձն» է, գրում է BBC-ին՝ հղում անելով Physical Review Letters ամսագրում տպագրված հոդվածին:

Նման հեղափոխական տեսություն են առաջ քաշել կանադացի գիտնականները: Թեեւ այս վարկածը գիտաֆանտաստիկ վեպի սյուժե է հիշեցնում, սակայն օգնում է լուծել ժամանակակից գիտության մեջ բացատրություն չունեցող որոշ պարադոքսներ: 

Ըստ նոր մոդելի՝ Մեծ պայթյունի ժամանակ երկու «սիմետրիկ» տիեզերք է ձեւավորվել: Այն տիեզերքում, որտեղ մարդիկ են ապրում, ժամանակը հոսում է մեզ համար սովորական կերպով, իսկ մյուսը՝ «հայելային անդրադարձը», նույն արագությամբ գնում է դեպի անցյալ:

 Մեծ պայթյունի տեսության համաձայն՝ տիեզերքը առաջացել է մոտ 14 մլրդ տարի առաջ. աշխարհն ընդարձակվել է խիտ եւ տաք սկզբնական պայմաններից եւ մինչ օրս էլ շարունակում է ընդլայնվել:

 Կանադացի ֆիզիկոսների առաջ քաշած մոդելը ենթադրում է, որ Մեծ պայթյունը սիմետրիայի կետ է հանդիսացել, որի տարբեր կողմերն են ցրվել Տիեզերքն ու Հակատիեզերքը, ճիշտ այնպես, ինչպես էլեկտրոնի ծնվելու պահին վակուումում ծնվում է դրա հակամասնիկը՝ պոզիտրոնը:

Գիտնականները եկել են այն եզրակացության, որ Հակատիեզերքը խիստ նման են մեր Տիեզերքին, սակայն դրա ճշգրիտ կրկնօրինակը չէ: