Դեկտեմբերի 27-ին Երեւանում եւ մարզերում ձյուն կտեղա. ջերմաստիճանը կտրուկ անկում է ապրելու

Հայաստանի ողջ տարածքը դեկտեմբերի 27-ին կգտնվի հզոր ցիկլոնի ազդեցության տակ։ Այս մասին NEWS.am-ին հայտնեց ՀՀ ԱԻՆ հիդրոմետ ծառայության տնօրեն Գագիկ Սուրենյանը՝ նշելով, որ Երեւանում եւ մարզերում դեկտեմբերի 27-ի երեկոյան ձյուն կտեղա։

«Հանրապետության ողջ տարածքը դեկտեմբերի 27-ին կգտնվի հզոր ցիկլոնի ազդեցության տակ, երեկոյան ձյուն կտեղա, որից հետո ցիկլոնի անցումը կուղղորդվի Գրենլանդիայի կողմից եկող, շատ ուժեղ ցուրտ արկտիկական հոսանքների ներթափանցմամբ, եւ ջերմաստիճանը այս օրերի համեմատ 13-15 աստիճանով կնվազի»,– ասաց Գագիկ Սուրենյանը։

Նրա խոսքով՝ դեկտեմբերի 28-ից սկսած -12 -13 աստիճան ցուրտ կլինի հանրապետության տարածքում։

Գագիկ Սուրենյանը հավելեց, որ նախորդ տարվա համեմատ՝ այս տարի խիստ ցուրտ է լինելու, քանի որ 2017-18թթ․ դարի ամենատաք ձմեռն է եղել եւ Նոր տարվա օրերին գրանցվել է +12 +13 աստիճան տաքություն։

Սուրենյանը այս մասին նաեւ ֆեյսբուքյան իր էջում կարճ գրառում էր արել․ «27-ից հետո թունդ ձմեռ է գալիս»։