Հարավային Կովկասի տարածաշրջանում սպառազինությունների մրցավազքը հարկավոր է դադարեցնել. ԱԳՆ

Հայաստանը կարծում է, որ Հարավային Կովկասի տարածաշրջանում շարունակվող սպառազինությունների մրցավազքը պետք է դադարեցվի: Դեկտեմբերի 20-ին ճեպազրույցում այս մասին հայտարարեց Հայաստանի արտգործնախարարության մամուլի քարտուղար Աննա Նաղդալյանը:

Պատասխանելով Բելառուսի նախագահ Ալեքսանդր Լուկաշենկոյի՝ Ադրբեջանին սպառազինությունների մատակարարման մասին հայտարարությունը մեկնաբանելու խնդրանքին, Աննա Նաղդալյանը հիշեցրեց, որ հարցն արդեն մեկնաբանել են վարչապետի պաշտոնակատարը եւ նրա մամուլի քարտուղարը:

«Արտաքին գործերի նախարարության անունից կարող եմ միայն ավելացնել, որ տարածաշրջանում սպառազինությունների մրցավազքը գտնվում է ուշադրության կենտրոնում», - ասաց Աննա Նաղդալյանը` հավելելով, որ ԱԳ նախարարն այդ մասին արդեն ասել է ԵԱՀԿ ԱԳ նախարարների խորհրդի նիստում` գործընկերների ուշադրությունը հրավիրելով այն հանգամանքին, որ խնդիրը պետք է արտացոլվի նրանց պետությունների քաղաքականությունում: «Սպառազինությունների մատակարարումները պարզապես մեծացնում են դրանց կիրառման սպառնալիքը:

Այն, ինչը ոմանց համար բիզնես է, մեզ համար մահացու վտանգ է: Զենքի մրցավազքը հանգեցնում է անկայունության ավելացման: Հարցը միշտ բարձրացվում է գործընկերների հետ հանդիպումների եւ բազմակողմ հանդիպումների ժամանակ: Տարածաշրջանում սպառազինությունների մրցավազքը պետք է դադարեցվի», - ասաց Աննա Նաղդալյանը:

Միաժամանակ նա կոչ արեց ասվածը հնարավորությունների եւ վճռականության պակասի հետ չշփոթել:

«Հայաստանի ԶՈՒ-ն բավական պատրաստված է եւ զինված՝ Հայաստանի եւ Արցախի անվտանգությունը երաշխավորելու համար: Այստեղ երկու կարծիք չի կարող լինել», - ընդգծեց մամուլի քարտուղարը:

Լուրեր Հայաստանից - NEWS.am