Շարունակվում է «Օհանյան–Րաֆֆի–Օսկանյան» դաշինքի նախընտրական քարոզարշավը Սյունիքի մարզում (Տեսանյութ)

«Օհանյան–Րաֆֆի–Օսկանյան» դաշինքի անդամները, ցուցակի առաջին եռյակի՝ գեներալ–գնդապետ Սեյրան Օհանյանի, «Ժառանգություն» կուսակցության փոխնախագահ Արմեն Մարտիրոսյանի և ՀԱՄԱԽՄԲՈՒՄ կուսակցության նախագահ Վարդան Օսկանյանի գլխավորությամբ, նախընտրական քարոզարշավի շրջանակներում այցելել են Սյունիքի մարզի Կապան քաղաք։

Հիշեցնենք՝ նախօրեին դաշինքի անդամները եղել են Վայոց ձորի Եղեգնաձոր, Վայք և Սյունիքի մարզի Սիսիան ու Գորիս քաղաքներում, որտեղի բնակիչներին ներկայացրել են դաշինքի ծրագրային որոշ դրույթներ։
***
–Հայաստանում իշխանությունն ունի բացառապես 1 ցանկություն՝ հնարավորինս ունեզրկել ժողովրդին, արժանապատվությունից զրկել, արդարությանն ու օրինականությանը մուտք թույլ չտալ, որ մեր քաղաքացիներն արտագաղթեն,–Կապանի բնակիչներին ուղղված իր խոսքում նշել է Արմեն Մարտիրոսյանը՝ հավելելով, որ ՀՀԿ ցանկացած թեկնածուի ձայն տալով՝ այդ ձայնը գնալու է Սերժ Սարգսյանին, և այդ ամենն ավելի է սաստկանալու։ Մարտիրոսյանը կոչ է արել չխաբվել ՀՀԿ ցուցակի առաջին հորիզոնակններում գտնվող երիտասարդ, գեղեցիկ դեմքերով, որոնք որոշում կայացնող չեն, այսինքն՝ ինչպես «Խաթաբալայում», Նատալիին ցույց են տալու, Մարքրիտին կնության են տալու, Կարեն Կարապեյանն էլ մի որոշ ժամանակ հետո ասելու է՝ դրսում բարձր աշխատավարձով գործ ունեմ, և թողնելու է գնա, ինչպես արել է արդեն մի անգամ։

–Մենք իրական այլընտրանք ենք, որը կարող է արմատական փոփոխություններ անել, այդ գործը մենք միասնական պետք է անենք։ Հայաստանը, Ղարաբաղն ու Սփյուռքը մեկ բռունցք դարձած՝ պետք է պայքարեն հայ ժողովրդի շահերի համար,–ընդգծել է Մարտիրոսյանը՝ հավելելով, որ այդ եռամիասնությունը մարմնավրում է «Օհանյան–Րաֆֆի–Օսկանյան» դաշինքը, որը գիտի՝ ինչ անել և ինչպես երկիրն այս վիճակից դուրս հանելու համար։

Կապանցիներին է դիմել Վարդան Օսկանյանը.
–Ապրիլի 2–ին դուք իսկական այլընտրանք ունենք ձեր առջև այսօրվա իշխանություններին։ Իշխանություններն ամեն ինչ տապալել են, նրանց փոփոխության ժամանակը եկել է, և այս ընտրություններն այդ հնարավորությունը տալիս են։ Ընդդիմադիր դաշտում հետաքրքիր քաղաքական ներկապնակ է գոյացել, որոնց մեջ նաև վառ գույներով հանդես ենք գալիս մենք, և ես ձեզ կոչ եմ անելու ձեր ձայնը տալ մեր դաշինքին, քանի որ այստեղ համախմբվել են պետականության մեջ, կառավարման մեջ փորձ կուտակած մարդիկ, որոնք հստակ պատկերացում ունեն՝ ինչպես կարելի է երկրում իրավիճակ փոխել։ Մենք անպայման անդրադառնալու ենք աշխատավարձերին և թոշակներին, որոնք իսկապես շատ ցածր են, ոչ միայն ցածր են, այլ տարվա ընթացքում երբ սղաճ է լինում, չեն ինդեքսավորվում։ Մենք լրջորեն քննարկելու ենք դրանց բարձրացման խնդիրը։ Բանակում շատ արագ աշխատավարձերի խնդիր ենք լուծելու, որը նաև կենցաղային խնդիր կլուծի։ Պայմանագրային զինծառայողների աշխատավարձները մինչև 280,000 դրամ բարձրացվելու են, մեր սպաներինը, ենթասպաներինը՝ մինչև 480,000 դրամ, որպեսզի նրանք իրոք չմտահոգվեն իրենց առօրյա խնդիրները լուծելով, այլ կենտրոնանան երկրի, ժողովրդի պաշտպանության հարցերի վրա։

Վ. Օսկանյանը ներկայացրել է նաև դաշինքի ծրագրային այլ դրությներ, մայրերին ցուցաբերվելիք աջակցությունը, նշել 3,000,000–դրամանոց մայրական կապիտալի ստեղծման մասին։
–Մինչև 60,000,000 դրամ շրջանառություն ունեցող բոլոր բիզնեսներին 5 տարով ազատելու ենք բոլոր տեսակ հարկերից։ Լրջագույն օգնություն է տրվելու գյուղացիներին,–հավելել է Վ. Օսկանյանը։

ՀՀ ՊՆ նախկին ղեկավար Սեյրան Օհանյանը, դիմելով սյունեցիներին, ասել է.
–Մեր թիմի և անձամբ ինձ համար մեծ պատիվ է Սյունյաց աշխարհում և սյունեցի լինելով՝ գտնվել Սյունյաց կենտրոնում և այս չափազանց կարևոր ժամանակաշրջանում զրուցել, կիսվել մեր մտորումներով։ Մեր երկրի համար սա չափազանց կարևոր պահ է, և ապրիլի 2–ին մենք պետք է ընտրությունը կատարենք առաջիկա 5, հետագայում՝ նաև 10 տարիների համար։ Եվ այդ ընտրությունը կատարելու համար որոշման ընդունման հիմք պետք է հանդիսանա իրադրության գնահատումը, պարզաբանումը, թե մենք ի՞նչ իրողության մեջ ենք ապրում, ինչպիսին է մեր երկրի վիճակը, ինչպիսին է մեր տնտեսությունն ընդհանուր առմամբ, և նաև յուրաքանչյուր քաղաքացու վիճակը։ Մենք կարող ենք գալ այն եզրակացության, որ մենք առաջ չենք գնում, մենք շատ դանդաղ ենք շարժվում, վերջին տարիներին դոփում ենք նաև տեղում։ Ժողովրդի հետ տարվող գաղափարական աշխատանքը մեր ուշադրության կենտրոնում է լինելու։ Մեր ուշադրության կենտրոնում է լինելու այնպիսի հասկացություն, ինչպիսին հաշվետվողականությունն է։

7or.am