Արթուր Վանեցյանը ճիշտ էր 2

Օրեր առաջ, դեկտեմբերի 6-ին կայանալիք ԵԱՏՄ գագաթնաժողովին ընդառաջ, մեր հրապարակմամբ անդրադարձել էինք Նիկոլ Փաշինյանի, Արթուր Վանեցյանի եւ Սասուն Խաչատրյանի մասնակցությամբ հեռախոսային խոսակցությանը, իսկ ավելի ճիշտ, ԱԱԾ պետի զգուշացմանը ՀԱՊԿ գլխավոր քարտուղարի հնարավոր կալանավորման հետեւանքների մասին: 

Հիմա, երբ հանրության սեփականությունն են դարձել այդ հեռախոսազրույցի մյուս հատվածները, ավելի պարզ է դառնում, որ Արթուր Վանեցյանն իրոք ճիշտ էր, որ փորձում էր փրկել իրավիճակը, հնարավորին չափ մատչելի ձեւով բացատրելով, թե ինչ հետեւանքներ կունենա ՀԱՊԿ գլխավոր քարտուղարի ձերբակալությունը: 

Հիմա, երբ հրապարակվել են գաղտնալսման մնացած հատվածները, հարցերն ու մտահոգությունները միայն ավելանում են: Իհարկե, կարեւոր է պարզել, թե ինչպես է ձայնագրվել երեք բարձրաստիճան պաշտոնյաների հեռախոսազրույցը, ովքեր կամ ով է պատվիրատուն, բայց կան նաեւ այլ հարցեր: 

Առաջին հերթին անհասկանալի է, թե ինչու այդքան կարեւոր հարցը՝ Յուրի Խաչատուրովի՝ ՀԱՊԿ գլխավոր քարտուղարի կամ Ռոբերտ Քոչարյանի՝ ՀՀ երկրորդ նախագահի կալանավորմանն առնչվող հարցերը չի քննարկվել բարձր մակարդակով, ավելի հանգիստ պայմաններում:

Ակնառու է պետական կառավարման համակարգում առկա խորը ճգնաժամը, առանց որի նման սկանդալային պատմություն չէր կարող լինել:

Ակնհայտ է նաեւ, որ դատավորը ճնշման է ենթարկվել, եւ նա այլեւս չի կարող զբաղեցնել այդ բարձր դիրքը: Եւ անհասկանալի են այն պնդումները, թե ոչ Փաշինյանը, ոչ Վանեցյանը, ոչ Խաչատրանն այս առնչությամբ չեն չարաշահել իրենց զբաղեցրած դիրքը:

Ցավալի է, բայց ակնհայտ, որ այս պատմության մեջ ներքաշվածներից միայն Արթուր Վանեցյանն է գիտակցում պետական շահը, փորձում դուրս գալ, մեղմ ասած, ճգնաժամային վիճակից: 

Հուսանք, որ այս սկանդալային պատմությունը գոնե դաս կդառնա, եւ այսուհետ նեղ անձնական շահերը վեր չեն դասվի պետական շահից եւ պետության անվտանգությունից: Վերջապես պետք է հասկանանք, որ կալանավորելով, դատելով հեռու չենք կարող գնալ, որովհետեւ այդ տրամաբանության մեջ պետք է ձերբակալվեն, կալանավորվեն, դատվեն ոչ թե տասնյակ կամ հարյուրավոր, այլ հազարավոր, անգամ տասնյակ հազարավոր մարդիկ:

Եւ արդեն այդքան էլ էական չէ, թե այս գաղտնալսման հրապարակումով որքան է ընկնում Նիկոլ Փաշինյանի վարկանիշը: Այստեղ առավել կարեւորն այն է, որ պարզեցինք, թե պետության համար ամենակարեւոր, ամենագլխավոր հարցերը լուծվում են ոտքի վրա:

Նույն գաղտնալսումից երեւում է, որ Նիկոլ Փաշինյանը հեռախոսով զրուցում է միջպետական նիստի ժամանակ, ցածր ձայնով: Սա եւս անհասկանալի եւ մտահոգիչ է: Նախ էթիկապես դա ճիշտ չէ, եւ ամենակարեւորը, մի՞թե պարզ չէ, որ այդ վիճակում անհնար է ճիշտ որոշումներ կայացնել: 

Top-News.am