Հայաստանի հավաքականի մրցակիցները հայտնի են

Իռլանդիայի մայրաքաղաք Դուբլինում կայացավ ֆուտբոլի Եվրոպայի առաջնության ընտրական փուլի վիճակահանությունը:

Հայաստանի հավաքականը հայտնվեց վերջին՝ J խմբում:

Ահա այսպիսին են մյուս խմբերը. 

A խումբ - Անգլիա, Չեխիա, Բուլղարիա, Չեռնոգորիա, Կոսովո

B խումբ - Պորտուգալիա, Ուկրաինա, Սերբիա, Լիտվա, Լյուքսեմբուրգ

C խումբ - Հոլանդիա, Գերմանիա, Հս. Իռլանդիա, Էստոնիա, Բելառուս

D խումբ - Շվեյցարիա, Դանիա, Իռլանդիա, Վրաստան, Ջիբրալթար

E խումբ - Խորվաթիա, Ուելս, Սլովակիա, Հունգարիա, Ադրբեջան

F խումբ - Իսպանիա, Շվեդիա, Նորվեգիա, Ռումինիա, Ֆարերյան կղզիներ, Մալթա

G խումբ - Լեհաստան, Ավստրիա, Իսրայել, Սլովենիա, Մակեդոնիա, Լատվիա

H խումբ - Ֆրանսիա, Իսլանդիա, Թուրքիա, Ալբանիա, Մոլդովա, Անդորա

I խումբ - Բելգիա, Ռուսաստան, Շոտլանդիա, Կիպրոս, Ղազախստան, Սան Մարինո

J խումբ - Իտալիա, Բոսնիա և Հերցեգովինա, Ֆինլանդիա, Հունաստան, Հայաստան, Լիխտենշտեյն

Առաջին հանդիպումները կկկայանան մարտին, իսկ 2020 թվականի գարնանն արդեն հայտնի կդառնան եզրափակիչ փուլի մասնակիցները:

Եվրոպայի առաջնության եզրափակիչ փուլին կմասնակցեն խմբերում առաջին եւ երկրորդ տեղերը գրաված թիմերը, իսկ մյուս չորս ուղեգրերը բաժին կհասնի Ազգերի լիգայի չորս խմբերի հաղթողներին:

Այսպիսով, ամեն ինչ պետք է արվի խմբում երկրորդ տեղը գրավելու համար, իսկ եթե մատնվենք անհաջողության, ապա պետք է հույս դնենք մակեդոնացիների վրա, որ նրանք իրենց խմբում կարողանան գրավել առաջին կամ երկրորդ տեղը:

Հիմա անդրադառնանք Հայաստանի հավաքականի մրցակիցներին:

Իտալիան այս տարի չմասնակցեց աշխարհի առաջնությանը, ինչը մեծ անակնկալ էր: Այս հավաքականը լավագույն վիճակում չէ, իսկ ՖԻՖԱ-ի դասակարգման աղյուսակում զբաղեցնում է ընդամենը 18-րդ տեղը:

Բոսնիա եւ Հերցեգովինան բավական ամուր թիմ է, որին հաղթելը շատ դժվար է: Այս հավաքականը դասակարգման աղյուսակում զբաղեցնում է 34-րդ հորիզոնականը:

Ֆինլանդիան այն հավաքականն է, որին Հայաստանի հավաքականը, լավագույն համալրման դեպքում, ի վիճակի է հաղթել թե Երեւանում, թե Հելսինկիում: Ֆինները դասակարգման աղյուսակում  58-րդ տեղում է:

Հունաստանի հավաքականը դասակարգման աղյուսակում 43-րդ տեղում է:

Ինչ վերաբերում է մեզ լավ ծանոթ Լիխտենշտեյնին, ապա նրանք դասակարգման աղյուսակում ընդամենը 181-րդն են:

Համեմատության համար նշենք, որ Հայաստանը 101-րդ տեղում է:

Հայաստանն Իտալիայի հետ անցկացրել է երկու հանդիպում: Մեկ խաղ ավարտվել է ոչ-ոքի՝ 2:2 հաշվով, իսկ մյուս խաղում իտալացիները հաղթել են 3:1 հաշվով:

Բոսնիա եւ Հերցեգովինայի հետ Հայաստանի ընտրանին մրցել է 2008 եւ 2009 թվականներին: Երեւանում բոսնիացիները հաղթել են 2:0, իսկ Սարաեւոյում՝ 4:1 հաշիվներով:

Ֆինների հետ հանդիպել ենք չորս անգամ՝ 2004-2006 թվականներին: Մեկ անգամ խաղն ավարտվել է 0:0 հաշվով, իսկ երեք անգամ հաղթել են ֆինները՝ 1:0, 3:1 եւ 2:0 հաշիվներով:

Հունաստանի ազգային թիմի հետ Հայաստանի ընտրանին հանդիպել է երկու պաշտոնական եւ երկու ընկերական հանդիպումներում: Պաշտոնական խաղերում հույները հաղթել են 1:0 եւ 2:0 հաշիվներով, իսկ ընկերական հանդիպումներից մեկն ավարտվել է 0:0, իսկ մյուսում կրկին հաղթել են հույները՝ 1:0 հաշվով:

Իսկ Լիխտենշտեյնի հավաքականների հետ երկու հանդիպումները շատ թարմ են ֆուտբոլասերների հիշողություններում: Հայաստանը հաղթել է 2:1 հաշվով, իսկ մյուս խաղն ավարտել 2:2 հաշվով:

Այսպիսով, իր առաջիկա մրցակիցների հետ Հայաստանի ընտրանին հանդիպել է 14 անգամ. տարել ընդամենը մեկ հաղթանակ, չորս խաղ ավարտել ոչ-ոքի, իսկ մյուս՝ ինը խաղերում պարտվել: Ինչպես ասում են, վիճակագրությունը առանձնապես չի ոգեւորում, բայց հաղթանակները վիճակագրությամբ չեն կերտում:

Top-News.am