Զորակոչը՝ հունվարի 7-ից

Կառավարությունն իր այսօրվա՝ նոյեմբերի 29-ի որոշմամբ, ընդունեց շարքային կազմի պարտադիր զինվորական ծառայության 2018 թվականի զորակոչ հայտարարելու և զորացրում կատարելու մասին որոշում:

Որոշմամբ 2018 թվականի դեկտեմբեր-2019 թվականի հունվար ամիսներին հայտարարվում է Հայաստանի Հանրապետության արական սեռի այն քաղաքացիների շարքային կազմի պարտադիր զինվորական և այլընտրանքային ծառայությունների ձմեռային զորակոչը, որոնց 18 տարին լրանում է մինչև 2018 թվականի դեկտեմբերի 31-ը ներառյալ, ինչպես նաև այն քաղաքացիների, որոնց շարքային կազմի պարտադիր զինվորական ծառայության զորակոչից նախկինում տրված տարկետումը դադարում է մինչև 2018 թվականի դեկտեմբերի 31-ը ներառյալ:

Որոշմամբ նախատեսվում է 2018 թվականի ձմեռային զորակոչի շրջանակներում մինչև 2019 թվականի հունվարի 31-ը ներառյալ զորացրել օրենքով սահմանված ժամկետում շարքային կազմի պարտադիր զինվորական կամ այլընտրանքային զինվորական ծառայություն անցած զինծառայողներին:

«Բուն համալրման գործընթացը նախատեսվում է սկսել 2019-ի հունվարի 7-ից»,-ասաց նախարարի պաշտոնակատար Դավիթ Տոնոյանը:

«Հաշվի առնելով նախընտրական, հետընտրական պրոցեսները՝ բոլոր պաշտոնյաներին խնդրում եմ ազնվորեն վերաբերվել իրենց պաշտոնեական պարտականությունների կատարմանը», - դիմելով գործընկերներին՝ ասաց Դավիթ Տոնոյանը։ Սրան արձագանքեց նիստը վարող առաջին փոխվարչապետի պաշտոնակատար Արարատ Միրզոյանը՝ նշելով. «Ես էլ եմ լիահույս, որ բոլոր պաշոնյաները հենց այդպես էլ վարվում են եւ հետայսու վարվելու են»: