Ոմանք ընկալել են, որ ես ու Ադրբեջանի նախագահը «չաթ» ենք անում. Նիկոլ Փաշինյան
Արցախի Հանրապետության շփման գծում հարաբերական հանգստությունը Դուշանբեում ձեռքբերված պայմանավորվածությունների արդյունք է: Լրագրողների հետ հանդիպմանն ասաց ՀՀ վարչապետի պաշտոնակատար Նիկոլ Փաշինյանը:
Նա նշեց, որ օպերատիվ կապի հետ կապված քննարկումներ եղան, այնպիսի տպավորություն է, «որ ոմանք ընկալել են, թե ես ու Ադրբեջանի նախագահն իրար հետ «չաթ» ենք անում», այնինչ տեղեկատվությունն ըստ անհրաժեշտության փոխանցվում է ներկայացուցիչների միջոցով:
Ըստ նրա՝ Հայաստանը պետք է համազգային ներուժը համախմբի՝ Արցախի հարցում լիարժեք պաշտպանելու մեր շահերը: «Ակնհայտ է բոլորի համար, որ Արցախի հարցը մեր երկրի համար ունի առանցքային նշանակություն: Կա չէ՞ բանակցային պրոցեսի առաջին օրվանից խորհրդավորության քողով պատելը:
Նույնիսկ հիմա ընկալում կա, որ Արցախի բանակցային գործընթացին տիրապետում են սահմանափակ թվով մարդիկ: Ես այդ մոտեցումը սխալ եմ համարում: ԼՂ հարցին պետք է տիրապետի հնարավորինս շատ մարդ: Այսօր ՀՀ ժողովուրդն Արցախի հարցի վերաբերյալ բանակցային գործընթացից ու բովանդակությունից տեղեկացված է առավել քան երբևէ: Այս մոտեցումը շարունակվելու է: Չեմ կարծում, թե Արցախի հարցով պետք է սահմանափակ թվով մարդիկ տեղեկացվեն»,- նշեց Նիկոլ Փաշինյանը: