Պահեստազորում գտնվող սպաների բնակարանային հարցը 3 տարում կլուծենք. Սեյրան Օհանյան

Ես խոսք եմ տալիս, որ պահեստազորում գտնվող շուրջ 2000 սպաների բնակարանային հարցը 3 տարում կլուծենք, մոտ 18 մլրդ դրամ է անհրաժեշտ այդ խնդրի լուծման համար: Արմավիրում «Օհանյան-Րաֆֆի-Օսկանյան» դաշինքի քարոզարշավի ժամանակ այսօր նման հայտարարություն է արել դաշինքի համամասնական ցուցակի առաջին համարը զբաղեցնող Սեյրան Օհանյանը:

«Պահեստազորում գտնվող սպաների բնակարանային հարցը շատ կարճ ժամանակահատվածում լուծվելու է: Հերթացուցակում գտնվող շուրջ 2000 մեր զոհված և հաշմանդամ դարձած մարտական ընկերների ընտանիքներին բնակարանային պայմանների բարելավման համար դրամական փոխանցումներ ենք անելու»,- ասաց նա:

Օհանյանի խոսքով՝ իրենք ժողովրդի հետ միասին կրելու են այն դժվարությունները, որոնք այսօր կան՝ տնտեսության ցածր մակարդակ, ժողովրդագրական խնդիրներ, արտագաղթ:

Ըստ նրա՝ այսօր ՀՀ ամենամեծ թերությունը մեր պետական համակարգի չձևավորված լինելն է և կառավարման մշակույթի բացակայությունը. «Չկան ժողովրդի հետ հասարակ շփումների կազմակերպման սկզբունքները և ձևերը, գաղափարական աշխատանքը և ամենակարևորը՝ հաշվետվողականությունը ժողովրդի առջև: Ես խոսք եմ տալիս, որ մենք հաշվետու ենք լինելու յուրաքանչյուր տարի, և անհրաժեշտության դեպքում վստահության հանրաքվե կանցկացնենք: Եթե ճիշտ չենք աշխատի, ապա մեր քաղաքական թիմը պետք է իր տեղը զիջի մնացած թիմերին»,- նշեց Օհանյանը:

tert.am