«Հրազդան» մարզադաշտ այլեւս չունենք. այն կործանեցին համատեղ ջանքերով

Աշոտ Աղաբաբյանին պատկանող «Հրազդան» մարզադաշտը HSBC բանկում գրավ է դրված 26 մլն դոլարով: Այս մասին երեկ՝ նոյեմբերի 12-ին, լրագրողների հետ հանդիպման ժամանակ ասաց Հայաստանի ֆուտբոլի ֆեդերացիայի նախագահ Արթուր Վանեցյանը: Նա նաեւ նշեց, որ անգամ գրավից հանելուց հետո այն կրկին ըստ նշանակության օգտագործելը շատ բարդ կլինի:

Նա ասաց, որ վերակառուցման համար անհրաժեշտ կլինի շատ ավելին, քանի գրավն է՝ մի քանի տասնյակ մլն դոլարներ: Բացի այդ՝ փաստ չէ, որ վերակառուցումից հետո ՖԻՖԱ-ն ու ՈՒԵՖԱ-ն թույլ կտան այնտեղ հանդիպումներ անցկացնել: Այն մի շարք առումներով չի համապատասխանում միջազգային չափորոշիչներին, օրինակ, ճանապարհներն են նեղ, տեղանքն է անհարմար:

Ցավոք, Վանեցյանը տեղյակ չէ, որ նույն այդ «Հրազդան» մարզադաշտում ՖԻՖԱ-ի ու ՈՒԵՖԱ-ի թույլտվությամբ պաշտոնական հանդիպումներ են անցկացվել:

Այնպիսի տպավորություն է, որ շուտով «Հրազդան» մարզադաշտի տեղում մի քանի բազմաբնակարան շեն եւ մոլ կկառուցվի: