Կարող են լինել ուսուցիչների կրճատումներ

Խոսքը չի գնում ուսուցիչների կրճատման մասին, այլ խոսքը գնում է դրույքների ամբողջացման մասին: Այս մասին լրագրողների հետ զրույցում ասաց ՀՀ կրթության և գիտության նախարարի ժամանակավոր պաշտոնակատար Արայիկ Հարությունյանը:

«Տարբեր առարկաների բաշխվածությունն ուսուցիչների մեջ արդյունավետություն չի ապահովում, բայց մենք միևնույն ժամանակ գիտակցում ենք, որ այո, կարող են լինել որոշ դեպքեր, երբ կրճատումներ կլինեն: Բայց մենք չենք գնա այդ քայլին, մինչև չհասկանանք, թե այդ մարդկանց որտեղ ենք ներգրավելու, և դա կլինի տարբեր միջոցներով` վերապատրաստումների միջոցով, թափուր աշխատատեղերի համար նրանց պատրաստելու միջոցով»,-ասաց նա:

Արայիկ Հարությունյանը նշեց, որ իրենց մասնագետների տված տվյալներով` ուսուցիչների աշխատավարձի որոշ բարձրացում 2019 թվականին, այնուամենայնիվ, լինելու է: «Բյուջեի քննարկման ժամանակ մեր նախարարությունն այս հարցը բարձրացրել է, և ինչպես վարչապետի պաշտոնակատարն ասաց`բյուջեն իներցիոն է, բայց փոփոխություններ, կարծում եմ, որ մյուս տարի լինեն»,-ասաց նա:

Վերջինս նշեց, որ կառավարությունը շուտով կընդունի որոշում, որով կսահմանվի դպրոցների ֆինանսավորման նոր բանաձև: «Սա զգալիորեն կօգնի ամենացածր դրույքների առումով խնդրի լուծմանը, և զգալի թեթևացում կլինի մինչև 300 աշակերտ ունեցող դպրոցների առումով, որոնք թերֆինանսավորում են ստանում»,-ասաց նա և նշեց, որ այսուհետ հաշվի է առնվելու ոչ միայն աշխատողների թիվը, այլ նաև դասարանների քանակը:

Ինչ վերաբերում է հարցին, թե դպրոցներում հանձնարարում են, որ երեխաները կարդան Նիկոլ Փաշինյանի «Չար տնակ» հեքիաթը, նա ասաց, որ նման օրինակ չգիտի, թեև նշեց, որ ինքն այդ հեքիաթը չի կարդացել և դրա գրական արժեքը չի կարող գնահատել:

«Երբ սեպտեմբերին այցելում էի դպրոցներ, ես հեղափոխության հետ կապված որոշ ատրիբուտներ էի նկատում, և տնօրենների մոտ զարմանք էր առաջացնում, երբ ասում էի, որ պետք է արգելվեն»,-ասաց նա:

Արայիկ Հարությունյանն ասաց, որ բուհերի խորհուրդները կորոշեն, թե բուհերի ռեկտորները կփոխվեն, թե ոչ, բայց մեկը մյուսի հետ խորհուրդները կփոխվեն և արդեն փոխվում են: Գիտության կոմիտեի աշխատանքներին անդրադառնալով՝ նա ասաց, որ գիտության զարգացմանը զուգընթաց պետք է գիտության կոմիտեն զարգանա:

Նախարարի պաշտոնակատարն ասաց, որ իրեն վերջերս տեղեկացրել են, որ ուսումնական հաստատությունների մասով հինգ տասնյակից ավելի քրեական գործեր կան: «Մարդիկ երբեմն կարծել են, որ իրենք անպատիժ են, և որևէ փոփոխություն ՀՀ-ում չի լինելու, իրենք ցմահ լինելու են իրենց պաշտոններին և ինչ ուզել են, արել են»,-ասաց նա: