ՀԷՑ-ում կրճատումներ կլինեն
Անցկացված հետազոտությունների արդյունքում առաջիկայում կկրճատվեն «Հայաստանի էլեկտրական ցանցեր» ընկերության 150 աշխատակիցներ: Այս մասին նոյեմբերի 5-ին Հայաստանի գազ եւ էլեկտրաէներգիա մատակարարող եւ բաշխող համակարգերի գործունեության, գազի եւ էլեկտրականության գործող սակագների հիմնավորվածության ուսումնասիրման նպատակով ստեղծված Քննիչ հանձնաժողովի նիստում ասաց էներգետիկայի եւ բնական պաշարների նախարարի պաշտոնակատար Գարեգին Բաղրամյանը:
Ընդ որում՝ նա նշեց, որ բազմիցս հայտարարել է օպտիամալացման մասին, իսկ դրա արդյունքում տնտեսված միջոցները կուղղվեն սակագների նվազեցման աշխատանքներին:
«Միաժամանակ, պետք է նշեմ, որ այս կրճատումները ոչ մի կերպ չեն անդրադառնա տվյալ կազմակերպության տրամադրած ծառայությունների որակի վրա»,- պարզաբանեց Բաղրամյանը:
Ընկերության գլխավոր տնօրեն Կարեն Հարությունյանն իր հերթին հայտնեց, որ կրճատման ենթակա աշխպատակիցները առաջիկա տարվա ընթացքում իրենց աշխատավարձը կստանան 100 տոկոսով: Հաջորդ տարի այն կկրճատվի մինչեւ 50 տոկոս: