Զինված ավազակային հարձակում Արմավիրում. հարձակվողները դիմակներով են եղել

ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ավազակային հարձակման դեպքի առթիվ:

ՀՀ Քննչական կոմիտեիցհայտնում են, որ 2018թ. նոյեմբերի 1-ի լույս 2-ի գիշերը՝ ժամը 04:10-ի սահմաններում, երկու դիմակավորված անհայտ անձ՝ նախնական համաձայնությամբ ուրիշի գույքի հափշտակություն կատարելու նպատակով, զենքի գործադրմամբ հարձակվել են Արմավիր քաղաքի Երեւանյան փողոցի 25/1 հասցեում գործող վարկային կազմակերպության («Ֆաստ Կրեդիտ ՈՒՎԿ» ՓԲԸ- խմբ) Արմավիրի մասնաճյուղի աշխատակիցների վրա՝ նրանց կյանքի ու առողջության համար վտանգավոր բռնություն գործադրելու սպառնալիքով:

02.11.2018թ. դեպքի առթիվ ՀՀ ոստիկանության Արմավիրի բաժնում հարուցվել է քրեական գործ` ՀՀ քրեական օրենսգրքի 175-րդ հոդվածի 2-րդ մասի 1-ին եւ 4-րդ կետերի եւ 235-րդ հոդվածի 1-ին մասի հատկանիշներով եւ նույն օրը ընդունվել վարույթ ՀՀ Քննչական կոմիտեի Արմավիրի մարզային վարչություն:

Նախաքննության ընթացքում վարկային կազմակերպությունը եւ երկու աշխատակիցները ճանաչվել են տուժող:

Կատարվել է դեպքի վայրի զննություն, նշանակվել են դատահետքաբանական, դատագենետիկական, դատաապրանքագիտական փորձաքննություններ:

Կատարվում են անհրաժեշտ քննչական գործողություններ առերեւույթ հանցագործություն կատարած անձանց ինքնությունը պարզելու եւ վարույթն իրականացնող մարմնին ներկայացնելու վերաբերյալ:

Նախաքննությունը շարունակվում է: