Առնետավազքի նրբությունները «նոր» Հայաստանում

Ազգային Ժողովի «Ելք» խմբակցության պատգամավոր Հայկ Կոնջորյանը դեմքի ամենահպարտ արտահայտությամբ հայատարարել է, թե լքում է «Լուսավոր Հայաստան» կուսակցությունն ու միանում Նիկոլ Փաշինյանի թիմին։ Հատուկ ընդգծում ենք, որ լքել է այն կուսակցությունը, որի օգնությամբ, ինչպես ժողովուրդն է ասում՝ մարդամեջ է դուրս եկել:

Նմանատիպ հայտարարություններով են վերջին շրջանում հանդես գալիս գյուղապետեր ու այլ պետեր, որոնք դեռ հույս ունեն փրկվել, իրենց համոզմամբ, խորտակվող ՀՀԿ-ական եւ այլ անվանումներով նավերիից։ Կարճ ասած՝ առնետավազք է․ միանգամայն բնականոն պրոցես հետխորհրդային, զարգացման ցածր մակարդակում գտնվող երկրներում։

Անբնականն այստեղ հանրության արձագանքն է այս առնետավազքին։ Հետևելով սոցիալական ցանցերում և մեդիայում այս թեմայով արձագանքներին՝ կարելի է անհուսորեն հիասթափվել ոչ միայն կյանքից, այլև պատկերացնում եք՝ հեղափոխությունից։

Ոչ մի կերպ հնարավոր չէ երևակայել, թե ի՞նչ պրոցեսներ են կատարվում մեր հպարտ քաղաքացիների ուղեղում այն պահին, երբ վերջիններս ողջունում, հիանում և գովերգում են նման առնետավազքը։

Ինչի՞ համար էր այս հեղափոխությունը։

Ի վերջո, սպառված կերակրատաշտակից նոր, թարմ կերակրատաշտակ թռչկոտող մարդկանց սկզբունքայնության մասին ոչ-ոք հարցադրում չի հնչեցնում։ Ո՞ւր են մնացել նրանց գաղափարախոսությունները, թեզերը․․․

Իրականում, ըստ պահի նպատակահարմարության ճամբար փոխող մարդկանց պատճառով է նաև, որ երկիրը հայտնվել է նման իրավիճակում, որ այսօր չունենք տնտեսություն, չունենք քաղաքական դաշտի դեմք ու դիմագիծ, չունենք մշակույթ ու մտավորականություն՝ եզակի բացառությունները չհաշված։

Ինչո՞վ է տարբերվում այդքան հորջորջվող «նոր» Հայաստանը հնից, ի՞նչ է փոխվել, ի՞նչ ենք մենք անում նախկին արատավոր երևույթները մերժելու, վերացնելու ուղղությամբ։

Վստահ պնդում ենք՝ ոչի՛նչ․․․ քանի դեռ ողջունում ենք անգաղափար ճամբարափոխությունը, որոշումներ ենք կայացնում փողոցում, կուրորեն տրվում ենք էմոցիաներին, չենք գնահատում հավելյալ արժեք ստեղծող մարդու, բիզնեսմենի տեսակին, ամեն ինչ պտտվելու է ի շրջանս յուր։ Ավելի ճիշտ՝ ի շրջանս կոտրած տաշտակի։

Վերջում՝ լավ նորություն ունենք առնետավազքի սիրահարների համար․ Սամվել Նիկոյանը հայտարարել ու պնդել է՝ ՀՀԿ-ն ձերբազատվել է քրեաօլիգարխիկ համակարգի տարրերից, նրանք տեղավորվել են իշխանության կողքին։ Բարի վայրէջք դեպի «հին Հայաստան»։

Հ.Գ. Եթե Կոնջորյանը կամ մեկ այլ գործիչ գաղափարախոսական տարաձայնությունների կամ մարտավարական, ինչու չէ նաեւ ռազմավարական տարաձայնությունների համար լքի կառավարող կուսակցությունը եւ մաս կազմի ընդդիմադիր մի ուժի, անգամ եթե ընդդիմադիր կուսակցության ներկայացուցիչը տեղափոխվի մեկ այլ ընդդիմադիր կուսակցություն, այս ամենին մենք շատ նորմալ կվերաբերվենք, բայց երբ նույնիզկ ոզնուն է պարզ, որ լքում են իրենց ծնած, սնած կուսակցությունը բացառապես կուշտ ապրելու համար, այստեղ նրանց փոխարեն ամոթից գլուխներս կախ ենք գցում, ավելին, մեր աչքերում արցունքներ են հայտնվում:

Գրիգոր Հայրապետյան

Top-News.am