Անհասկանալի է, թե ինչու է Փաշինյանը կրկին առաջադրվում

Մեր սկզբունքը չի փոխվում, մենք որեւէ հարցով չենք խոչընդոտելու։ Այս մասին այսօր՝ հոկտեմբերի 31-ին, լրագրողների հետ զրույցում ասաց ՀՀԿ խմբակցության ղեկավար Վահրամ Բաղդասարյանը՝ պատասխանելով հարցին, թե այս անգամ ինչպես է քվեարկելու ՀՀԿ–ն ԱԺ–ում վարչապետի ընտրության քվեարկությանը։

«Սա ձեւական բնույթ է կրում, ես առաջադրման իմաստը չեմ տեսնում, նախորդ անգամ եթե կար մի բառ «քվեարկություն» բառի համար էր առաջադրվում, հասկանալի է, այս անգամ չեմ հասկանում՝ ինչու է առաջադրվում»,–ասաց Բաղդասարյանը։

Դիտարկմանը, որ նախորդ անգամ վարչապատեի պաշտոնակատար Նիկոլ Փաշինյանը չի հասցրել խոսել տնտեսության մասին, Բաղղադսարյանը նկատեց. «Կարելի էր Կապանի ընտրություններին 20 րոպե չտրամադրեր եւ խոսեր տնտեսականի մասին»։

Նշենք, Ազգային ժողովի պատգամավորների 1/3-ն հոկտեմբերի 30–ին վարչապետի պաշտոնակատար Նիկոլ Փաշինյանին առաջադրել է վարչապետի թեկնածու:

Ստորագրահավաքին միացել են 43 պատգամավորներ, այդ թվում «ԵԼՔ-ի, «Ծառուկյան» խմբակցության եւ ՀՀԿ-ի քաղաքական թիմից հեռացած 4 պատգամավորները՝ Արսեն Միխայլովը, Կնյազ Հասանովը, Տաճատ Վարդապետյանն ու Շիրակ Թորոսյանը։

Հիշեցնենք, որ Նիկոլ Փաշինյանը վարչապետի պաշտոնից հրաժարական է տվել հոկտեմբերի 16-ին: Հոկտեմբերի 24-ին Ազգային ժողովում տեղի է ունեցել վարչապետի ընտրության առաջին փուլը, որտեղ վարչապետ չի ընտրվել: Ամենայն հավանականությամբ, ԱԺ արտահերթ ընտրությունները տեղի կունենան դեկտեմբերի 9-ին՝ կիրակի:

Լուրեր Հայաստանից - NEWS.am