Մայր աթոռն արձագանքում է Կառավարության որոշմանը
«Առաջին լրատվական»-ի զրուցակիցն է Ամենայն Հայոց Կաթողիկոսի մամլո խոսնակ Տ. Վահրամ քահանա Մելիքյանը։
–Տեր հայր, Կառավարությունը բացասական եզրակացություն տվեց «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքում լրացումներ կատարելու մասին» ՀՀ օրենքի նախագծին, որով առաջարկվում էր օրենքով երաշխավորել Ամենայն Հայոց Կաթողիկոսի անվտանգության ապահովումը, ինչպես երաշխավորված է ԱԺ նախագահի, վարչապետի, հանրապետության նախագահի անվտանգությունը: Ինչպե՞ս է Մայր Աթոռը վերաբերվում այս որոշմանը։
-Հետևելով հոկտեմբերի 25-ին ՀՀ կառավարության նիստի ընթացքին, տարակուսանք ենք հայտնում օրակարգում ընդգրկված առանձին հարցերի վերաբերյալ կայացրած որոշումների և եզրահանգումների առնչությամբ:
Այսպես, «Երեխաների իրավունքների մասին» օրենքում լրացումներ կատարելու մասին» օրենքի նախագիծը, որը միտված էր բացառելու երեխաների միջավայրում այլասերվածության ու սեռական սանձարձակության քարոզչությունը, մերժվեց սոսկ այն պատճառաբանությամբ, որ իբրև գործող օրենսդրությունն արդեն իսկ կարգավորել է այդ խնդիրը: Մինչդեռ ակնհայտ է, որ առկա օրենսդրությունը, այնուամենայնիվ, գործնականում ոչ միայն չի կանխել վերոնշյալ բնույթի արատավոր երևույթները, այլև ըստ էության նպաստել է դրա շրջանակների ընդլայնմանը:
Իսկ «Հավաքների ազատության մասին» օրենքում փոփոխություն կատարելու օրենսդրական նախաձեռնությունը, որը վերաբերում է մեր եկեղեցիների ու վանքերի տարածքում ոչ արտոնյալ հավաքների արգելմանը, համակողմանի քննարկման նյութ չդարձավ: Այս դեպքում խնդիրը դարձյալ լուծված չէ, թեպետ կրկին ընդգծվում էր այն պատճառաբանությունը, թե իբրև գործող օրենսդրությունն արդեն իսկ բավարար իրավական հիմքեր է ամրագրել Հայ Առաքելական Սուրբ Եկեղեցու բնականոն գործունեությունը խաթարող հավաքները բացառելու համար: Ցավոք, բերված փաստարկներից և ոչ մեկն առ այսօր գործնականում չի կիրառվել և որպես բավարար հիմք չի նկատվել այդպիսի հավաքներն արգելելու համար, այնպես, ինչպես Սուրբ Էջմիածնում, Երևանի Սուրբ Աննա եկեղեցում և այլ եկեղեցիների տարածքներում իրականացված հակաեկեղեցական գործողությունների պարագայում, ինչն արդեն հակասության ցուցիչ է՝ բերված հիմնավորումների և փաստացի իրավիճակի միջև: Եթե օրենքը տալիս է բավարար բոլոր հնարավորությունները, ապա ինչպես բացատրել շարունակվող գործողությունները և այս հարցում պատկան պետական կառույցների կրավորական կեցվածքը:
Առավել քան անընդունելի է, երբ նախագծի մերժման հիմնավորում ներկայացված փաստաթղթում Հայ Առաքելական Սուրբ Եկեղեցին իր կարգավիճակով նույնականացվում է կրոնական կազմակերպությունների հետ՝ անտեսելով սահմանադրական այն հիմնադրույթները, որոնք ընդգծում են Հայ Առաքելական Սուրբ Եկեղեցու բացառիկ առաքելությունը մեր ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:
–Կառավարության նախօրեին կայացրած որոշումը հայտնի օրինագծի վերաբերյալ անհանգստություն կամ մտահոգություն առաջացնո՞ւմ է Վեհափառի անվտանգության մասով։
-Ինչ վերաբերում է «Հատուկ պետական պաշտպանության ենթակա անձանց անվտանգության ապահովման մասին» օրենքում առաջարկվող փոփոխությանը և պետական պաշտպանության ենթակա անձանց ցանկում Ամենայն Հայոց Կաթողիկոսի ընդգրկմանը, ապա նշեմ, որ Մայր Աթոռ Սուրբ Էջմիածինն անհանգստացած չէ Վեհափառ Հայրապետի անվտանգությամբ, թեև վերջին ժամանակաշրջանի որոշ դեպքեր, ինչպես օրինակ` Գնդեվանքում կատարվածը, կարող էին նման մտահոգությունների տեղիք տալ: Պետական անվտանգության ապահովման համար հատուկ միջոցների ձեռնարկումը տվյալ դեպքում պետության իրավասության տիրույթում է: Կարծում ենք, որ իշխանությունները սույն հարցին լուծում կտան՝ հիմք ընդունելով ինչպես Սահմանադրությամբ ամրագրված Հայ Եկեղեցու որպես ազգային եկեղեցու կարգավիճակը և քննարկվող խնդրի բարոյական կողմը:
Հույս ենք հայտնում, որ երկրի օրենսդիր և գործադիր մարմինները համարժեք քայլեր կձեռնարկեն վերը նշված հարցադրումների իրավաչափ լուծման տեսանկյունից՝ համահունչ մեր ժողովրդի ակնկալիքներին:
Մայր Աթոռը գնահատում է սրտացավ հայորդիների նախաձեռնությունները:
Ապարանից մինչև Սպիտակի ոլորաններ կատարվում են գծանշման աշխատանքներ․ հնարավոր են երթևեկության սահմանա...
Իսպանիայի Տեներիֆե–Անդորրա հանդիպումն ավարտվել է սարսափելի միջադեպով (տեսանյութ)
Գերմանիայում խաղաղ երթերը վերածվել են անկարգությունների, վանդալիզմի և խանութների թալանի
Սահմանվել է Ռուսաստանի Դաշնությունից ՌԴ կանխիկ արժույթի արտահանման արգելք
Եվրահանձնաժողովն իր աջակցությունն է հայտնել Լեհաստանի վարչապետին
Երեք ծառայողի նկատմամբ կիրառվել է Ծառայության դադարեցում կարգապահական տույժը (տեսանյութ)
Անցում զենքի պարզ մատակարարումից դեպի ավելի խորը ռազմատեխնիկական փոխգործակցություն
Նեթանյահուն Թրամփին հորդորում է հարվածել Իրանին ԱՄՆ միջանկյալ ընտրություններից անմիջապես հետո
Իրանը պատրաստ է 48 ժամվա ընթացքում բացել Հորմուզի նեղուցը՝ իր պայմանները կատարելու դեպքում
Օլեշկիից տարհանված ուկրաինացիները Ուկրաինայում են