Հայաստանում հեղափոխությանը պետք է վերջ տրվի. Արմեն Բադալյան

Հայաստանում հեղափոխությանը պետք է վերջ տրվի, ինչի համար անհրաժեշտ են արտահերթ խորհրդարանական ընտրություններ: NEWS.am-ի հետ զրույցում այս մասին ասաց քաղտեխնոլոգ Արմեն Բադալյանը:

Նա նշեց, որ ապրիլ-մայիսյան իրադարձությունները հանգեցրին կառավարման համակարգում իշխանափոխության, իսկ հասարակության գիտակցության մեջ՝ հեղափոխության: «Տրամաբանությունը հուշում է, որ երկրում բոլոր քաղաքական ուժերը, անկախ այն հանգամանքից՝ խորհրդարանում են, թե ոչ, պետք է սա հաշվի առնեին, հարմարվեին իրավիճակին եւ համապատասխան քայլեր ձեռնարկեին, այսինքն՝ անցկացնեին կառուցվածքային, իմիջային փոփոխություններ, սա հատկապես վերաբերում է Հանրապետական կուսակցությանը: Դրա համար անհրաժեշտ էր մեկ տարի, ինչի հետ կապված նախապես նշվում էր, որ արտահերթ ընտրությունները պետք է կայանան մեկ տարի հետո, մայիսին մոտ»,- նշեց Բադալյանը: Սակայն Երեւանի ավագանու ընտրությունները ցույց տվեցին, որ կուսակցությունները ոչ մի գործողություն չձեռնարկեցին, նոր իրավիճակին չհարմարվեցին, ինչի հետ կապված չեն կարողանում համարժեք քաղաքականություն վարել: «Դրանից բացի, սեպտեմբերի 23-ից հետո «Բարգավաճ Հայաստան» եւ ՀՅԴ կուսակցությունները, որոնք ջախջախիչ պարտություն կրեցին (ավագանու ընտրություններում), ոչ միայն քաղաքականությունը չփոխեցին, այլեւ շարունակում են նախկին կուրսին հետեւել»,- ասաց քաղտեխնոլոգը:

Փորձագետը նշեց, որ այս ընտրություններից հետո «Բարգավաճ Հայաստանը» եւ ՀՅԴ-ն պետք է վարչապետից իրենց առանձնացնեին, հետ կանչեին իրենց նախարարներին, կատարեին իմիջային փոփոխություններ, սկսեին քննադատել վարչապետին ու կառավարությանը, որը կոպտագույն սխալներ է թույլ տալիս ինչպես ներքին, այնպես էլ արտաքին քաղաքականության մեջ: «Բայց ի՞նչ տեղի ունեցավ: Այս ուժերը շարունակեցին գնալ հին կուրսով, ավելին՝ նրանք ընտրեցին վարչապետի թիմից առանձնանալու ամենաանհաջող ճանապարհը, փաստորեն միանալով ՀՀԿ-ի հետ՝ քվեարկելով հայտնի օրինագծի օգտին»,- ասաց Բադալյանը: «Նրանց թվաց, թե ինչ-որ օրենքի ընդունմամբ կկարողանան կանխել հաջորդ զարգացումները: Սակայն դա անհնար է: Համաշխարհային պատմության մեջ մեծաթիվ են նախադեպերը, երբ նման փորձերը ֆիասկո են ապրել: Եվ նրանք գնացին այդ ճանապարհով: Արդյունքում՝ միայն արագացրին արտահերթ ընտրությունների անցկացման գործընթացը, քանի որ պարզվեց, որ անիմաստ է հաջորդ տարվան սպասելը, ժամանակը, որ նրանց տրվել էր բարեփոխումներ անցկացնելու համար, չի օգտագործվել ըստ նշանակության»,- ասաց փորձագետը:

«Երկրորդ՝ անհրաժեշտ է հեղափոխությանը վերջ տալ: Երեւանում դա արդեն ստացվել էր, քաղաքապետ ընտրվեց, իսկ ավագանիում ընդդիմություն կա, որը հասարակության վստահությունն է վայելում: Համանման վիճակ պետք է լինի նաեւ խորհրդարանում: Անհրաժեշտ է, որպեսզի հասարակության վստահությունն ունեցող ընդդիմությունը քննադատի կառավարության գործունեությունը, որը կոպիտ սխալներ է թույլ տալիս: Ներկայումս քննադատոևթյուն չկա, քանի որ նման ընդդիմություն չկա: Հեղափոխական գործընթացներին վերջ տալու համար պետք է լեգիտիմ խորհրդարան ձեւավորվի: Հեղափոխությունը կավարտվի, եւ այդ դեպքում կառավարությունը չի կարողանա իր բացթողումները վերագրել հեղափոխությանը կամ հակահեղափոխությանը: Հենց սա է պատճառը, թե ինչու է անհրաժեշտ ընտրություններն անցկացնել մինչեւ տարեվերջ»,- ամփոփեց նա:

Բադալյանը չհամաձայնեց այն որոշ պնդումներին, որ հոկտեմբերի 2-ին Փաշինյանի գործողությունները միջամտություն էին օրենսդիր իշխանության գործունեությանը: «Վարչապետը խորհրդարանական ուժերից մեկի առաջնորդն է, բացի այդ՝ գործադիր իշխանությունը չի կարող ամբողջությամբ անջատված լինել օրենսդիրից: Սա նորմալ գործընթաց է: Ավելին՝ շատ երկրներում, որբ վարչապետները զգում են, որ իրենց վարկանիշն անկում է ապրում, ցրում են խորհրդարանը եւ արտահերթ ընտրություններ անցկացնում: Ուստի չի կարելի խոսել օրենսդիր իշխանության գործունեությանը վարչապետի միջամտության մասին»,- նշեց նա:

Ի պատասխան հարցին՝ խորհրդարանում ո՞ր ուժերը կկարողանան ընդդիմություն ձեւավորել, որոնք արտահերթ ընտրություններից հետո կունենան հասարակության վստահությունը, Բադալյանը նշեց, որ այս պահին վաղ է նման կանխատեսումներ անել: «Ամեն ինչ կախված է նրանից, թե ով կգնա ընտրությունների: Այս պահին, կարծում եմ, հնարավորություններ ունի «Բարգավաճ Հայաստան» կուսակցությունը, «Լույս» դաշինքը եւ հնարավոր է՝ Հայ ազգային կոնգրեսը»,- նշեց նա՝ հավելելով, որ առայժմ վաղ է խոսել խորհրդարանում ուժերի ապագա դասավորության մասին:

Լուրեր Հայաստանից - NEWS.am