Սասուն Միքայելյանի 25-ամյա որդին ուզում է Հրազդանի քաղաքապետ դառնալ

ԱԺ պատգամավոր Սասուն Միքայելյանի 25–ամյա որդին՝ Հրազդանում քաղաքապետի թեկնածու ինքնաառաջադրված Սեւակ Միքայելյանը բարձր է գնահատում իր շանսերը քաղաքապետի ընտրություններում։

«Կարեւորը Հրազդանի ժողովուրդը որոշի՝ ով է լինելու Հրազդանի քաղաքապետ։ Ես այդ կասեմ, ուրիշ ոչինչ չեմ ասի»,– ասաց նա։

Հարցին, թե ինչու ՔՊ–ն չի պաշտպանում իր թեկնածությունը քաղաքապետի ընտրություններին, Սեւակ Միքայելյանը ասաց. «Կարեւորը, որ իմ Հրազդանի ժողովուրդը նորմալ ընդունի, կարեւրորը, առաջնայինը իմ համար դա է»։

Նա հավելեց, որ ասուլիսով հանդես կգա եւ կպատասխանի բոլոր հարցերին։

«Ճիշտ չեմ համարում հիմա որեւէ հարցի պատասխանել, քարոզարշավի ժամանակ կերեւա, ճիշտ չի էլի։ Հրազդանի ժողովուրդը ինքը կորոշի՝ ով է լինելու քաղաքապետ»,–ասաց նա։

Սեւակ Միքայելյանը, այնուամենայնիվ, վստահ է, որ գլուխ կհանի Հրազդանի խնդիրներից. «Հրազդան քաղաքը գտնվում է ծայրահեղ ծանր վիճակում, բայց վստահ եմ, որ կլուծեմ բոլոր խնդիրները»։

Սեւակ Միքայելյանը նշեց, որ ինքը հիմա էլ շարունակում է ղեկավարել ՔՊ–ի տարածքային կառույցը եւ մինչ այս 4 տարի ղեկավարել է ՔՊ–ի Հրազդանի տարածքային կառույցը։

ՔՊ մամուլի խոսնակՎահան Կոստանյան էլ NEWS.am-ի հետ զրույցում ասաց, որ Հրազդանի քաղաքապետի ժամանակավոր պաշտոնակատար Լիլիթ Ստեփանյանը չի ցանկացել առաջադրվել, իրենք էլ այլ հարմար թեկնածու չեն ունեցել։

«Հրազդանում մենք թեկնածուներից ոչ մեկին չենք պաշտպանի։ Եւ պետք է դուրս գալ նախկին իշխանությունների այդ մտածելակերպից, որ իշխող կուսակցությունը անպայման պետք է խոշոր քաղաքներում իր թեկնածուին առաջադրի, հնարավոր է եւ չառաջադրի, դա պարտադիր չէ»,–ասաց նա։

Նշենք, որ նախընտրական քարոզարշավը տեղի կունենա հոկտեմբերի 9-15–ը։

Հիշեցնենք, որ Հրազդանի համայնքապետի արտահերթ ընտրությունները տեղի կունենան հոկտեմբերի 21-ին: Ընտրություններին մասնակցելու համար առաջադրվել է 5 թեկնածու: ՔՊ-ն Հրազդանում թեկնածու չի առաջադրելու: