Արթուր Բաղդասարյանի որոշումը եւ իրականությունը

Պարզվեց «Օրինաց երկիր» կուսակցությունը բացառում է քաղաքական համագործակցությունը Ռոբերտ Քոչարյանի հետ: Ավելին, այս կուսակցությունն անգամ բացառում է համագործակցությունը Քոչարյանին սատարող քաղաքական կազմակերպությունների հետ:

Այս մասին ՕԵԿ-ի նախընտրական ծրագրի շնորհանդեսի ժամանակ հայտարարել է ՕԵԿ նախագահ Արթուր Բաղդասարյանը։

Անկասկած, այս հայտարարությունը լավ լուր է առաջին հերթին հենց Ռոբերտ Քոչարյանի համար, հետո նաեւ նրան սատարող քաղաքական ուժերի համար: Ոչ Քոչարյանին, ոչ հայաստանյան որեւէ քաղաքական ուժի Արթուր Բաղդասարյանի հետ համագործակցությունը անգամ չնչին օգուտ չի կարող տալ:  

Գործող կառավարությանը հաճոյանալու համար Բաղդասարյանն ասել է, թե իրենք աջակցել ու շարունակելու ենք աջակցելու հեղափոխությանը: 

Ավելորդ չէ հիշեցնել, որ Արթուր Բաղդասարյանը Ռոբերտ Քոչարյանի նախագահության տարիներին զբաղեցրել է ԱԺ նախագահի պաշտոնը. 2003 թ. հունիսի 12-ին ընտրվել է ՀՀ Ազգային Ժողովի նախագահ եւ 2006 թ. մայիսի 29-ին ներկայացրել է հրաժարական այդ պաշտոնից։ Իսկ արդեն ավելի ուշ՝ 2008-ի մարտի 1-ի ողբերգական դեպքերից ժամեր առաջ շտապեց զբաղեցնել ՀՀ անվտանգության խորհրդի քարտուղարի պաշտոնը, եւ շատերի կարծիքով իր այդ որոշմամբ նպաստեց դեպքերի ողբերգական եւ արյունալի զարգացմանը:

Այնպես որ, Արթուր Բաղդասարյանը հայտարարություն անելուց առաջ գուցե փորձի վերանայել իր եւ իր կուսակցության ինքնագնահատականը, որ անհարմար վիճակում չհայտնվի: 

Վարդան Մխիթարյան