Հայաստանի հավաքականը մի կերպ հաղթեց գաճաճ Լիխտենշտեյնին

Մեկնարկեց ֆուտբոլի ՈւԵՖԱ-ի Ազգերի լիգայի մրցաշարը: Առաջին հանդիպումն անցկացրեց նաեւ Հայաստանի ազգային հավաքականը:

Եթե համառոտ, ապա լավ է, որ Լիխտենշտեյնին հաղթեցինք, թեկուզ եւ մի կերպ, բայց շատ վատ է, որ Եվրոպայի ամենաթույլ հավաքականներից մեկին մի կերպ ենք հաղթում:

2:1 հաշվով հաղթել Լիխտենշտեյնին դա ամոթ է, չնայած հիմա շատերը կասեն, թե կարեւորը հաղթանակն է: Այո, իսկապես, կարեւորը հաղթանակն է, բայց ոչ պակաս կարեւոր է խաղի որակը, երբ մասնակցում ես խմբային մրցաշարի, որտեղ ամեն ինչ մի խաղով չի վերջանում:

Սեպտեմբերի 9-ին Մակեդոնիայում մրցելու ենք տեղի հավաքականի հետ, եւ շատ կարեւոր է, որ մեր հավաքականի ղեկավարությունը կարեւոր եզրահանգումներ անի:

Այսօր տպավորություն էր, որ խաղացողները միմյանց չեն հասկանում: Տպավորություն էր, որ Հենրիխ Մխիթարյանի մոտ ազգային հավաքականում ազտղային հիվանդություն է առաջանում, դրանից բխող ծանր հետեւանքներով, եւ վերջապես տպավորություն էր, որ թիմը մտածում է, թե կքանգնած հաղթելու են լիխտենշեյնցիներին:

Ամոթ է, որ Լիխտենշտեյնը երկու գրոհ կազմակերպեց եւ մեկ գոլ խփեց: Հայաստանի հավաքականում լավ տպավորություն թողեցին Համբարձումյանը, Պիզելին եւ Օզբիլիսը:

Ինչ վերաբերում է գոլերին, ապա գոլի հեղինակ դարձան Պիզելին եւ Բարսեղյանը, որը գոլը խփեց Օզբիլիսի փայլուն անցումից եւ փոխանցումից հետո:

Ավելացնենք, որ Մխիթարյանը չիրացրեց 11 մետրոնոց հարվածը եւ կորցրեց դարպասը գրավելու առնվազն երեք հնարավորություն:

Top-News.am