Այսօր 20,00-ին՝ «Փյունիկ»-«Մաքքաբի»

«Փյունիկ»-«Մաքքաբի» Թ.Ա. հանդիպումը կայանալու է այսօր Վազգեն Սարգսյանի անվան «Հանրապետական» մարզադաշտում. սկիզբը՝ 20:00-ին:

Հանդիպումից առաջ կայացել է երևանյան թիմի գլխավոր մարզիչ Անդրեյ Տալալաևի մամուլի ասուլիսը.

«Եկեք համարենք, որ չենք ուսումնասիրել մրցակցին ու կենտրոնացել ենք միայն մեր խաղի վրա»,- այսպես սկսեց մարզիչը:

Խոսելով մրցակցի մասին՝ Տալալաևն ասաց.

«Մեզ գնալով ուժեղ մրցակիցներն են բաժին հասնում: «Վարդարում» ուժեղ կատարողներ կային, սակայն թիմային խաղը մի փոքր չստացվեց : «Տոբոլի» մոտ հակառակն էր: Անհատապես ուժեղ ֆուտբոլիստներով չէին համալրված, սակայն թիմային խաղը լավն էր: «Մաքքաբիի» մասին կասեմ, որ մարզիչը շատ լավն է, որին անձամբ չեմ ճանաչում, սակայն գիտեմ, որ ուժեղ մասնագետ է:

Վստահ կարող եմ ասել, որ ոչ մեկից չենք վախենում»:

Էրիկ Վարդանյանի վերադարձի ու ակումբի մանկապատանեկան թիմերի մասին.

«Ես ուրախ եմ, որ Էրիկ Վարդանյանը վերադարձել է: Ուրախ եմ, որ «Փյունիկ» են վերադառնում նաև մանկապատանեկան թիմերի խաղացողները ու մարզիչները: Մանկապատանեկան դպրոցի մարզիչների ու կազմի հետ մեծ հանդիպում է եղել: Ներկա է եղել նաև Արմեն Գյուլբուդաղյանցը, որին համարում եմ շատ ուժեղ մասնագետ:

Իտալացի մարզիչ ենք հրավիրել «Միլանից», Ռուսաստանից երկու մարզիչ կա, որոնք կօգնեն երկրորդ թիմին: Ուրախ եմ, որ համալրվում ենք: Մինչև սեպտեմբերի 1-ը բոլորը կվերադառնան, թե ակումբի ներկայացուցիչները, թե պարզապես խաղացողները: Դրանից հետո մեր դռները փակ են լինելու բոլորի համար: Աշխատանք է տարվում երիտասարդական թիմերի հետ, որպեսզի հաջորդ տարիներին ավելի ուժեղ լինենք ու ավելի հզոր կերպով դիմավորենք մեր մրցակիցներին»,- ասաց Տալալաևը: