Արտակարգ դրություն մցնելու հրամանագիրը ամբողջությամբ համապատասխանում է օրենսդրությանը

2008 թվականի մարտի 1-ին արտակարգ դրություն մցնելու ՀՀ նախագահի հրամանագիրը ամբողջությամբ համապատասխանում է օրենսդրությանը եւ Հայաստանի ստանձնած միջազգային պարտավորություններին: Այս մասին այսօր՝ հուլիսի 28-ին, լրագրողների հետ հանդիպման ժամանակ նշեց ՀՀ երկրորդ նախագահ Ռոբերտ Քոչարյանի փաստաբան Սարգիս Գրիգորյանը:

Նրա խոսքով, ՀՀ նախագահը մարտի 1-ի դրությամբ ուներ սահմանադրական պարտականություններ եւ իրավունքներ՝ հայտարարելու արտակարգ դրություն, եթե կան սահմանադրական կարգին սպառնացող վտանգներ:

«Խոսում ենք անվտանգության մասին, որը եղել է ոչ միայն արտաքին, այլեւ՝ ներքին: Այդ ժամանակ եղել են ներքին ու արտաքին խնդիրներ: Ներքին խնդիրները անմիջականորեն սահմանադրական կարգին սպառնացող վտանգների պարագան էր: Թե պրոցեսուալ, թե ընթացակարգային տեսանկյուններից նախագահի գործողությունները եղել են իրավաչափ եւ համապատասխանել են գործող օրենսդրությանը»,-ասաց նա:

Անդրադառնալով զինված ուժերի ներգրավմանը ներքին կյանքին, պաշտպանը ընդգծեց, որ Սահմանադրությունում հստակ նշված է, որ զինված ուժերն ապահովում են Հայաստանի անվտանգությունը. «Անվտանգություն ասելով պետք է հասկանալ նաեւ ներքին անվտանգությունը, մարդու անվտանգությունը»:

Ինչ վերաբերում է սահմանադրական կարգի տապալմանը, որում մեղադրվում է Ռոբերտ Քոչարյանը, ենթադրում է, որ պետք է քանդվի գործող սահմանադրական ինստիտւտ եւ ստեղծվի նորը. «Սահմանադրական ինստիտուտ Հայաստանում չի վերացվել եւ նորը չի ստեղծվել»: