Հայաստանն ազատվում է խայտառակ ռեյտինգային ընտրահամակարգից

Ընտրական օրենսգրքում փոփոխությունների վարչապետին առընթեր հանձնաժողովը երկրորդ նիստում կարևոր որոշումներ է կայացրել նոր ընտրակարգի անցնելու և կուսակցությունների ու դաշինքների համար խորհրդարան անցնելու անցողիկ շեմի վերաբերյալ: Ինչպես հաղորդում է «Արմենպրես»-ը, հանձնաժողովի նիստից հետո լրագրողների հետ հանդիպմանը ՀՀ առաջին փոխվարչապետ Արարատ Միրզոյանը տեղեկացրեց, որ հանձնաժողովը ընտրակարգի և խորհրդարան անցնելու շեմի մասին երկու էական որոշում է ընդունել։ «Հանձնաժողովն ամրագրել է, որ ընտրակարգը պետք է լինի ամբողջովին համամասնական՝ փակ ցուցակներով։ Խորհրդարան անցնելու շեմը կուսակցությունների և դաշինքների համար իջեցվելու է 1%-ով»,- նշեց Արարատ Միզոյանը։

Առաջին փոպվարչապետը ռեյտինգային ընտրակարգը վերացնելու համար հստակ փաստարկներ նշեց, որոնք քննարկվել են նիստի ընթացքում։ «Ռեյտինգային ընտրակարգի լավ կիրառումն այս պահին Հայաստանում իրականացնելը հնարավոր չէ։ Ընտրակարգի ֆիքսումն առավելագույնս ընտրությունները քաղաքականացնելու նպատակ ունի, ինչպես նաև կանայք ավելի շատ հնարավորություն կստանան ԱԺ-ում մանդատ ստանալու, քանի որ ռեյտինգային ընտրակարգի դեպքում մեծամասամբ տղամարդիկ են անցողիկ շեմը հաղթահարում»,- ասաց Արարատ Միրզոյանը։

Օրակարգի մյուս հարցերին հանձնաժողովի անդամները անդրադառնալ չեն հասցրել ու դրանք կքննարկեն հաջորդ նիստին։

Գործող Ընտրական օրենսգրքում խորհրդարան անցնելու շեմը կուսակցությունների համար 5 տոկոս է, կուսակցությունների դաշինքների համար՝ 7 տոկոս: