ԵԱՀԿ-ն հայտարարել է Հարավային Կովկասի երկրների հետ կապերն ընդլայնելու մտադրության մասին

ԵԱՀԿ-ն հայտարարել է Հայաստանի, Վրաստանի և Ադրբեջանի հետ համագործակցությունն ամրապնդելու մտադրության մասին: Այդ մասին ասված է Հարավային Կովկասի երկրներ այցից հետո տարածված հայտարարությունում:

Հիշեցնենք, որ ԵԱՀԿ-ի 24 մշտական ներկայացուցիչների խումբն այցելել է Հայաստան, Վրաստան և Ադրբեջան: Այս ձևաչափով վերջին տարիների ընթացքում առաջին այցի նպատակն էր դեսպանների կողմից տարածաշրջանում ԵԱՀԿ սկզբունքների համաձայն խաղաղության, կայունության և բարգավաճման ամուր հանձնառությունը, ինչպես նաև այս երկրներում ԵԱՀԿ աշխատանքների ակտիվացման ուղղությամբ իրենց աջակցությունը վերահաստատելը:

Հունիսի 18-22-ը ԵԱՀԿ մշտական ներկայացուցիչները հանդիպումներ են անցկացրել Երևանում, Թբիլիսիում և Բաքվում բարձրաստիճան պաշտոնյաների, տարբեր քաղաքական կուսակցությունների և քաղաքացիական հասարակության ներկայացուցիչների հետ:

Հաղորդվում է, որ բանակցությունների ժամանակ հատուկ ուշադրություն է հատկացվել անվտանգության, հակամարտությունների և վերջին քաղաքական զարգացումների հարցերին:

Ֆրանսիայից դեսպան Վերոնիկ Ռոջեր Լականն այցի ընթացքում փոխանցել է խմբի համատեղ ուղերձները՝ ընդգծելով ի շահ ընդհանուր անվտանգության ԵԱՀԿ-ի ավելի ակտիվ համագործակցությանն աջակցությունը:

«ԵԱՀԿ-ն ցանկանում է ընդլայնել իր կապերը Հայաստանի, Վրաստանի և Ադրբեջանի հետ՝ երկրների հասարակություններին և կազմակերպությանն անվտանգության բոլոր հարթություններում օգուտ տալու նպատակով»,- ասել է նա:

Ինչպես նշվում է հայտարարությունում, Հայաստանում վարչապետ Նիկոլ Փաշինյանի և արտգործնախարար Զոհրաբ Մնացականյանի հետ քննարկումները կենտրոնացել են ԵԱՀԿ-ի հետ Հայաստանի շարունակական համագործակցության կարևորության վրա:

Այս հանդիպումների և Ազգային ժողովում խորհրդակցությունների մասնակիցները շնորհակալություն են հայտնել վերջին տարիներին ԵԱՀԿ-ի աշխատանքի համար և շահագրգռվածություն հայտնել շարունակական համագործակցության վերաբերյալ: Հանդիպում է կայացել նաև ԵԱՀԿ ծրագրի շահառուների և ծրագրերի իրականացման նախկին գործընկերների հետ:

«Ես վերադառնում եմ Վիեննա՝ խորապես ոգեշնչված Հարավային Կովկասի երեք երկրներ այդ կարևոր այցելությունից»,- հայտարարել է ԵԱՀԿ մշտական խորհրդի նախագահ Ալեսանդրո Ազոնին:

Նա հավելել է, որ կազմակերպության նպատակը վստահության ամրապնդումն է և ԵԱՀԿ-ի հետ Հարավային Կովկասի երկրների համագործակցությունն ակտիվացնելու ցանկությունը:

«Նրանք կարևոր դեր են զբաղեցնում ԵԱՀԿ-ի օրակարգում, և մենք միմյանց հետ կիսվելու շատ բան ունենք փոխադարձ անվտանգությունն ամրապնդելու համար»,- նշել է Ազոնին:

Այս թեմայով ԵԽ-ն կողմ է քվեարկել ԵՄ-Հայաստան Համապարփակ և ընդլայնված համագործակցության համաձայնագրին Հայաստանը Եվրամիության հետ համաձայնագիրը կվավերացնի մինչև մայիս «Բրյուսելում այժմ համաձայնագրի ստորագրման թուղթն ու թանաքն են պատրաստում»․ ԵՄ դեսպան