Հայաստանում պետք է հաղթի բանականությունը

Ինչեր ասես, որ չեն անի ամբոխները խելագարված: Այո, նույն ամբոխները կարող են եւ դրական ազդեցություն ունենալ, բայց նաեւ՝ բացասական, եթե իրավիճակը դուրս գա վերահսկողությունից: Հավատացեք, մեր բազմաչարչար երկիրը ոչ Սիրիա է, ոչ էլ Լիբիա, որ մարդկային եւ նյութական ռեսուրսներ գտնի աղետից հետո ոտքի կանգնելու համար:

մենք հենց հիմա պետք է հույզերը մի կողմ դնենք եւ փորձենք բանականության օգնությամբ լուծել խնդիրը: Մենք այդ ներուժն ունենք: Հանրապետականները պետք է հասկանան, որ այլեւս նախկին ձեւերով հնարավոր չէ: ՀՀԿ-ն Հայաստանում այլեւս անելիք չունի:

Մյուս կողմում, հրապարակում կանգնածները պետք է հասկանան, որ այս երկիրը երկգույնանի չէ՝ սեւուսպիտակ չէ, որ խնդիրը պետք է կարգավորվի բոլոր շերտերի շահերից ելնելով, բայց եւ առաջին հերթին՝ պետության շահերից ելնելով:

Րոպե առաջ պետք է բանակցություններ սկսվեն: Րոպե առաջ պետք է կողմերը նստեն սեղանի շուրջ եւ լուծում գտնեն: Հատուկ շեշտենք, որ կողմերից մեկը հաստատ չպետք է լինի այն 55 հոգանոց խումբը, որն առամնց երկար մտածելու դեմ գնաց մի ամբողջ ժողովրդի:

Կողմերից մեկը պետք է լինի ժողովուրդը եւ նրա ներկայացուցիչը, իսկ մյուսը՝ կրկին ժողովուրդը եւ կառավարությունում, իշխանությունում գտնվող այն առողջ ուժերը, որոնք հասկանում են, որ Հայաստանն այլեւս փոխվել է եւ երկրում նոր փուլ է սկսվում:

Հայաստանը պետք է օգտագործի այս պահը առաջընթացի, զարգացման եւ բարգավաճման համար:

Top-News.am